Qorǵanys mınıstrligi úzdik mergenderdi irikteýde
Jarysqa qatysý úshin «Ońtústik», «Batys», «Shyǵys» óńirlik qolbasshylyqtarynyń segiz áskerı bólimi men desanttyq-shabýyldaý áskerlerinen 22 mergen keldi. Baıraqty dodaǵa qatysýǵa kelmes buryn áskerı qyzmetshiler óńirlik qolbasshylyqtardyń áskerı bólimderinde qatań irikteýden ótti. Saıys eki kezeńnen turady.
20 mamyrda ótetin birinshi kezeńniń qorytyndysy boıynsha saıysqa qatysýshylardyń jalpy sanynan 14 úzdik mergen tańdalady. Olarǵa mamyrdyń 22-i men 30-y aralyǵynda ekinshi kezeńnen ótýge týra keledi. Onyń nátıjeleri boıynsha tek on mergen iriktelinip alynady.
«Búgingi saıys barysynda bizdiń maqsatymyz Qazaqstannyń quramasyna nátıjelerdi jaqsartý úshin joǵary áleýeti bar myqty daıyndalǵan mergenderdi tańdaý bolyp tur», - deıdi saıystyń bas tóreshisi «Ońtústik» óńirlik qolbasshylyǵy áskerleri qolbasshysynyń jaýyngerlik daıarlyq jónindegi orynbasary Sabyr Kaıýmov.
Aldaǵy bolatyn saıystarǵa barynsha jaqyndatylǵan jaǵdaılar mergenderge alǵan mashyqtaryn pysyqtaýǵa, senimdilik pen tabandylyq qasıetterin tárbıeleýge septigin tıgizip, «Mergen shebi» halyqaralyq baıqaýyna moraldyq-psıhologııalyq turǵyda daıyndaıdy. Іriktelgen on mergen osy jylǵy tamyzdyń 1-i men 10-y aralyǵynda 40-shy áskerı bazada ótetin «ArMI-2017» saıysy sheńberinde «Mergen shebi» halyqaralyq baıqaýynda Qazaqstan Qurlyq áskerleriniń namysyn qorǵaıdy.
Baıqaý árqaısysy bes jattyǵýdy qamtıtyn 3 kezeńnen turady. Onyń bireýi túnde ótkiziletin «Jeke synaq» pen «Jup synaq», sondaı-aq «Toptyq synaqtan» turady. Osy kezeńderdiń jattyǵýlary qatarynda nysanaǵa oq atý, qorǵanystaǵy mergen, shabyldaý men torýylda, mergen bıatlony, áýe nysanasy boıynsha oq atý, arnaıy oq atý, patrýlderdiń jarysy, sondaı-aq «taýyp alyp, joıý» jattyǵýy bar.
