Qorǵanys mınıstrligi «Ómirińdi saqta» baǵdarlamasyn tanystyrdy
Qorǵanys mınıstrligi Tárbıe jáne ıdeologııalyq jumystar departamentiniń bastyǵy general-maıor Serik Borambaev, Qorǵanys mınıstriniń keńesshisi Aıgúl Tólembaeva, UQK Shekara qyzmeti dırektorynyń orynbasary polkovnık Tóleýjan Júnisov, Ulttyq ulan bas qolbasshysynyń tárbıe jáne áleýmettik-quqyqtyq jumystar jónindegi orynbasary polkovnık Qaırat Úmbetov buqaralyq aqparat quraldarynyń ókilderine áskerı qyzmetshiler arasynda oryn alatyn oqıǵalardyń negizgi sebepteri men baǵdarlamany iske asyrýdyń edáýir tıimdi joldaryn túsindirdi.
«Baǵdarlamanyń mazmuny tájirıbede qoldanýǵa barynsha yńǵaıly. Aqparattyq-ımıdjdik bloktan bastap, áskerı qyzmettiń qaýipsizdigin qamtamasyz etý maqsatynda áskerı ınfraqurylym obektilerin jetildirý jónindegi jumystardan zań shyǵarý qyzmetine deıingi aldyn alý baǵyttarynyń barlyq keshenin qamtydyq. Qazirgi ásker – ashyq áleýmettik ınstıtýt. Biz «Halyq únine qulaq asatyn memleket» qaǵıdatyn ustanamyz», – dep atap ótti general-maıor Serik Borambaev.
Sonymen qatar tárbıe qurylymynyń basshysy quqyqtyq jáne áskerı tártipti saqtaý, áskerı qyzmetshiler men olardyń otbasy múshelerin áleýmettik qoldaý, Qarýly kúshterdiń qoǵamdyq uıymdarmen, onyń ishinde sarbazdar analar komıtetimen ózara qarym-qatynasty jetildirý baǵytyndaǵy jumystyń jańa tásilderin engizý týraly aıtyp berdi. Áskerlerde qazirgi zamanǵy baılanys quraldaryn paıdalana otyryp, merzimdi qyzmettegi sarbazdardyń týystary jáne jaqyndarymen qarym-qatynas jasaý múmkindikterin keńeıtý sharalary da qabyldanyp jatyr.
«Biz «Ómirińdi saqta» baǵdarlamasy boıynsha jumystyń bes negizgi baǵytyn aıqyndadyq. Merzimdi qyzmetkerler arasynda problemalyq máselelerdi sheshý, ata-analarmen jáne qoǵamdyq uıymdardyń ókilderimen jumys júrgizilýde», – dedi polkovnık Tóleýjan Júnisov.
Prezıdenttiń áskerı qyzmetshilerdiń ómiri men densaýlyǵyn saqtaý jónindegi tapsyrmasyn oryndaý sheńberinde bıylǵy maýsym aıynda Qorǵanys mınıstri general-polkovnık Rýslan Jaqsylyqov «Ómirińdi saqta» baǵdarlamasyna bastamashy boldy. Ol áskerı ortadaǵy orny tolmas shyǵyndy azaıtýǵa baǵyttalyp otyr. Baǵdarlamada aldyn alý sharalarynyń kesheni jáne qoǵamnyń áskerge degen senimin arttyrýǵa jaǵdaı jasaý kózdelgen.
Odan ózge vedomstvoaralyq jumys toby baǵdarlamany ázirleýge de atsalysty. Onyń quramyna depýtattyq korpýstyń, Densaýlyq saqtaý, Joǵary bilim jáne ǵylym, Oqý-aǵartý, Mádenıet jáne sport, Aqparat jáne qoǵamdyq damý mınıstrlikteriniń, sondaı-aq kúshtik vedomstvolardyń ókilderi kirdi.
«Qazirgi ýaqytta biz sarbazdar analarynyń komıtetimen jáne olardyń óńirlerdegi ókilderimen tyǵyz qarym-qatynastamyz. Azamattardyń ótinishterimen jumys júrgizilip jatyr», – dedi polkovnık Qaırat Úmbetov.
Atalǵan qujat Qorǵanys, Tótenshe jaǵdaılar, Іshki ister mınıstrlikteriniń, Memlekettik kúzet qyzmetiniń jáne Ulttyq qaýipsizdik komıtetiniń birlesken buıryǵymen bekitildi. 2022-2025 jyldarǵa arnalǵan «Ómirińdi saqta» baǵdarlamasy úsh kezeńde júzege asyrylatyn bolady. Onyń nátıjeleri 2026 jylǵy qańtarda Qorǵanys mınıstrliginiń birlesken alqa otyrysynda shyǵarylady.
Foto : gov.kz
