Qorǵanys mınıstrligi oqý oryndarynyń kýrsanttary ant qabyldady
Qurlyq áskerleriniń áskerı ınstıtýtynda 270-ten astam, Áýe qorǵanysy kúshteriniń áskerı ınstıtýtynda 90-nan astam kýrsant ant qabyldady. Sonymen qatar, QR QM Kadet korpýsynda 240-tan astam kadet Otanyna adal bolýǵa ant berdi.
«Áskerı ant mátinindegi árbir sóz tereń maǵynaǵa ıe. Árbir kýrsant óziniń áskerı mindetin oryndaı otyryp, óz ómirbaıanyna áskerı ómirge jasaǵan qadamyn jazyp, azamattyq jáne adamgershilik jetilý synaǵyn ótkizedi», – dedi birinshi kýrs stýdentterine Qurlyq áskerleri áskerı ınstıtýtynyń bastyǵy general-maıor Dýlat Adyrbekov.
Kýrsanttar men kadetter bul kúndi máńgi este saqtaıtyny anyq. Búgin olar áskerı jolǵa túsip, Otan qorǵaý úshin joǵary mindettemeler aldy.
«Áskerı ant – eń aldymen, qasyq qany qalǵansha óz Otanyn qorǵaýǵa daıyn bolý. Endi sizderdiń barlyq áreketterińiz óz qoldaryńyzben bekitilgen saltanatty ant talaptaryna sáıkes bolý kerek»,-dedi óz sózinde Áýe qorǵanysy kúshteri áskerı ınstıtýtynyń bastyǵy avıatsııa general-maıory Dáýren Qosanov.
Saltanatty is-sharalar sanıtarlyq-gıgıenalyq normalardy saqtaý maqsatynda qonaqtardyń qatysýynsyz ótti. Kýrsanttardyń ata-analary óz uldarynyń ómirindegi mańyzdy oqıǵany oqý oryndary men áleýmettik jelilerdegi resmı ǵalamtor-resýrstary arqyly onlaın rejımde baqylady.
Áskerı oqý ornyna qabyldanǵan sátten bastap ant qabyldaǵanǵa deıin kýrsanttar men kadetter bastapqy áskerı daıyndyq kýrsynan ótkenin atap ótken jón. Bir aı ýaqyt aralyǵynda olar jalpyáskerı jarǵylardy zerdeledi. Sondaı-aq saptyq, fızıkalyq jáne atys daıarlyǵynan ótti.
