Qorǵanys mınıstrligi oqý oryndarynyń aqyly qyzmet túrleriniń tizimi keńeıtildi

NUR-SULTAN. QazAqparat – Qorǵanys mınıstriniń buıryǵyna ózgerister engizilip, vedomstvoǵa qarasty oqý oryndarynyń aqyly qyzmet túrleriniń tizimi keńeıtildi, dep habarlaıdy QR QM baspasóz qyzmeti.

Qazaqstan Respýblıkasy Qorǵanys mınıstriniń 2018 jylǵy 3 qarashadaǵy «Əskerı oqý oryndarynyń taýarlardy (jumystardy, kórsetiletin qyzmetterdi) ótkizý jónindegi aqyly qyzmet túrlerin kórsetý jáne olardyń taýarlardy (jumystardy, kórsetiletin qyzmetterdi) ótkizýden túsken aqshany jumsaý qaǵıdalaryn bekitý týraly» buıryǵyna ózgeris engizildi.

Jańa redaktsııada kadrlardy jáne orta býyn mamandaryn qaıta daıarlaý jáne biliktiligin arttyrý tizbesine jeke jáne zańdy tulǵalar engizildi. Qyzmet kórsetý tizimine aqyly negizde geraldıkalyq, kádesyı qyzmetteri men atrıbýtıka qosylǵan. Polıgondardy berýden túsetin qarajatty jumsaý úshin polıgondarǵa arnalǵan shyǵys materıaldary men jabdyqtaryn satyp alý engizildi.

Sondaı-aq buıryqqa engizilgen ózgeristerde aqyly negizde ǵylymı-eksperımentaldyq, oqý-materıaldyq, sport bazalaryn, kitaphanalardy 50, 200, 400 orynǵa arnalǵan túski as zalyn, 20 orynǵa arnalǵan VIP-zalyn, sondaı-aq konferentsııa men brıfıng zaldaryn, Ulttyq qorǵanys ýnıversıtetiniń akt zaldary men aýdıtorııalaryn olardyń fýnktsıonaldyq maqsaty boıynsha usyný kózdeledi.

Taǵy birneshe tarmaq normatıvtik quqyqtyq aktilerge monıtorıng júrgizý barysynda anyqtalǵan kemshilikterdi eskere otyryp, buıryqtyń jańa redaktsııasynda baıandalǵan.