Qorǵanys mınıstrligi Norvegııada qaza tapqan maıdangerlerge qatysty suraý saldy
Jaqynda Qazaqstannyń Qorǵanys mınıstrligine Parlament Senatynyń depýtattary Ekinshi dúnıejúzilik soǵysqa qatysty depýtattyq saýal joldaǵan edi. Senatorlar Norvegııa Koroldiginde qaza tapqan Qazaqstan jaýyngerleriniń týǵan jerin anyqtaýdy jáne elimizdiń dıplomatııalyq elshilerimen birge zertteý jumystaryn júrgizýdi, anyqtalǵan derekterdi jastarǵa patrıottyq tárbıe retinde aqparat kózderinde taratýdy qarastyrýdy suraǵan.
Qorǵanys mınıstrligi depýtattyq saýaldy qarap, RF Qorǵanys mınıstrliginiń arhıvine Norvegııa Koroldiginde sarbazdardyń máıitter jerlengen oryndardy anyqtaý boıynsha suraý salǵan. Sondaı-aq jergilikti áskerı basqarý organdary Petsamo-Kırkenessk operatsııasyna qatysqandardy, qaza tapqan Qazaqstan sarbazdarynyń sany boıynsha málimetterdi izdestirý jónindegi jumysty uıymdastyryp otyr.
«Ekinshi dúnıejúzilik soǵys jyldaryndaǵy qazaqstandyqtardyń taǵdyrlary týraly maqalalardy qazaqstandyq jáne norvegııalyq buqaralyq aqparat quraldarynda jarııalaý boıynsha jumys júrgizilýde. Qazaqstan jaýyngerleriniń jańa esimderin anyqtaý boıynsha izdestirý jumystaryn júrgizý jáne qujattardy zertteý boıynsha Qazaqstannyń zertteýshi ǵalymdary G.M. Meńdiqulovpen, A.J. Ǵabdýllınmen ózara is-qımyl jasaý uıymdastyrylýda. Jańa esimderdiń tabylýyna qaraı qaza tapqandardyń týystaryn izdestirý jumystaryn júrgizýge, anyqtalǵan derekterdi jastarǵa patrıottyq tárbıe retinde aqparat kózderinde taratýǵa daıyn ekenimizdi habarlaımyz», - delingen senatorlarǵa Qorǵanys mınıstrliginiń bergen jaýabynda.
Aıta ketsek, Petsamo-Kırkenessk operatsııasy – SSSR áskerı-teńiz flotynyń Soltústik jáne Karel frontynyń vermaht áskerine jasalǵan áskerı shabýyly. Aıqas Fınlıandııanyń soltústigi men Norvegııanyń soltústiginde 1944 jyldyń 7 qazany men 1 qarashasy aralyǵynda bolǵan.
