Qorǵanys mınıstrligi MıG-31 ushaǵy apatynyń yqtımal sebepterin aıtty
«Bizde eski avıatsııalyq tehnıka degen uǵym múlde joq. Sebebi áskerı tehnıkalar josparly túrde tehnıkalyq tekseris pen kúrdeli jóndeýden, reglamenttik jumystardan, modernızatsııadan ótkizilip turady. Qorǵanys mınıstrliginiń áýe kúshterin damytyp, jaraqtandyrý boıynsha keshendi jospary bar. Ol avıatsııalyq oqıǵalar qaýpin barynsha azaıtýy tıis. Áýe kúshterin damytyp, jaraqtandyrý jospary jańa ári básekege qabiletti ushaqtarmen qamtamasyz etýdi de qarastyrady. Avıatsııalyq bólimderde júıeli túrde áýe oqıǵalarynyń aldyn alý sharalary júrgiziledi. Atalmysh sharaǵa avıatsııalyq parktiń jaǵdaıy men analızi, parktiń senimdiligin arttyrý úshin tıisti jumystardyń bárin atqarý, ushý barysynda áýe tehnıkasynan aqaý shyǵýyna jol bermeý sekildi mańyzdy jumystar kiredi», - dedi Nurlan Ormanbetov OKQ-da onlaın rejımde ótken baspasóz máslıhatynda.
Áýe qorǵanysy kúshteriniń bas qolbasshysynyń aıtýynsha áskerı ushqyshtar jyl saıyn qaýipsizdik sharalaryna baılanysty konferentsııalarda bas qosady. Ol jıynda ushý saparlarynyń mańyzdy máseleleri talqylanady.
«BAQ-ta qazir ushaq apatyna baılanysty ártúrli joramal jazylyp júr. Alaıda ol boljamnyń bári durys emes dep aıtar edim. Qazir onyń apatqa ushyraý sebebin anyqtaý maqsatynda arnaıy komıssııa jumys júrgizip jatyr. Komıssııa áýe tehnıkasynyń apatyna ne sebep bolǵanyn zerttep, nusqalardyń bárin taldap, apattyń sebebin anyqtaıtyn qorytyndy shyǵarady», - dedi ol.
Nurlan Ormanbetov áýe tehnıkasynyń apatqa ushyraý jaǵdaıyna qatysty birshama nusqanyń qarastyrylyp otyrǵanyn aıtady.
«Onyń ishinde áýe tehnıkasynan ushý kezinde aqaý shyǵýy, syrtqy faktorlardyń yqpaly, sondaı-aq adam faktor sekildi nusqalar da zerttelýde. Atalmysh ushaqtyń ekıpajy óte saýatty áreket ete bildi. Bári jaıly aıaqtalýy úshin der kezinde sharalardy qolǵa alyp, avıatsııalyq tehnıkany saqtap qalýdyń bar amalyn qarastyrdy. Áıtse de osyndaı apat oryn alyp otyr. Komıssııanyń resmı qorytyndysyn kútseńizder dep ótinemiz. Ol týraly qosymsha aldaǵy ýaqytta habarlaımyz», - dedi ol.
Eske sala ketsek keshe Qaraǵandy oblysynda áskerı ushaqtyń apatqa ushyraǵany týraly habarlaǵan edik. Qulaǵan ushaqtan eki sarbaz zardap shekti.
