Qorǵanys mınıstrligi Mı-17 tikushaǵynyń apatqa ushyraý sebepterin jarııalady
ASTANA. 12 qyrkúıek. QazAqparat - Ústimizdegi jyldyń 22 tamyzynda «Astana» halyqaralyq áýejaıynyń mańynda apatqa ushyraǵan
MI-17 tikushaǵynyń apat sebepterin anyqtaý boıynsha qurylǵan vedomstvoaralyq komıssııa óz jumysyn aıaqtady. Bul týraly QR Qorǵanys mınıstrliginen málim etti.
Mı-17 tikushaǵy QR QK Áýe qorǵanysy kúshteri Áskerı-áýe kúshteriniń astanalyq avıabóliminiń qaraýynda bolǵan.
Apat «Astana» halyqaralyq áýejaıy qyzmetiniń qaýipsizdigin qamtamasyz etý maqsatynda ótkiziletin josparly oqý-jattyǵý ushýlaryn oryndaý kezinde oryn aldy. Keshendi is-sharalar Іshki ister mınıstrligi, Ulttyq qaýipsizdik komıteti, Qazaqstan Respýblıkasy Prezıdentiniń kúzet qyzmeti jáne basqa da memlekettik organdarmen tyǵyz baılanysta ótkizilgen bolatyn.
Vedomstvoaralyq komıssııa tekserý qorytyndysy boıynsha apattyń basty sebebi retinde - tikushaqtyń abaısyzda «sol jaqqa qaraı ózdiginen aınalý» rejımine túsip, sońynan «quıyndy shyǵyrshyq» rejımine tap bolýyn belgiledi. Tikushaqty lajsyzdan birden qondyrý áreketi saldarynan ol oırandalyp, órtene bastady.
Aýyr áskerı-transport tikushaǵynyń ushý erekshelikterine qatysty jáne ekıpajdyń ushý tapsyrmasynyń kúrdeliginiń jıyntyǵy apatty jaǵdaıǵa ákep soqty.
Tikushaq ekıpajy tikushaqty apatty jaǵdaıdan alyp qalýǵa tyrysyp, asqan jaýapkershilikpen óte kúrdeli jaǵdaıda óz boryshtaryn adal atqara bildi.
Áskerı jáne qyzmettik boryshyn atqarý kezinde kórsetken erligi men janqııarlyǵy úshin, Qazaqstan Respýblıkasy Prezıdentiniń Jarlyǵymen áýe apaty kezinde qaıtys bolǵan
Mı-17 tikushaǵy ekıpajynyń ofıtserleri qaza bolǵannan keıin II dárejeli «Aıbyn» ordenimen marapattaldy.
Óz áskerı boryshtaryn sońyna deıin oryndaǵan Qazaqstan Respýblıkasy qorǵaýshylarynyń dańqy arta bersin!
