Qorǵanys mınıstrligi Qazaqstan men Túrkııanyń áskerı tehnıkasyn salystyrdy

NUR-SULTAN. QazAqparat – Qorǵanys mınıstrligi túrkııalyq «ARMA» tehnıkasy men «Qazaqstan Paramaýnt Injınırıng» kompanııasy shyǵaratyn «BARYS»-tyń aıyrmashylyqtaryn atady, dep habarlaıdy QazAqparat tilshisi.

«Synaqtan ótkizgen kezde «BARYS» brondalǵan dóńgelekti mashınasynyń jaýynkerlik modýli men onyń dóńgelekter bazasy sıpattamada kórsetilgen málimettermen sáıkespeıtini belgili boldy jáne konstrýktıvtik ózgeristerdi qajet etetini anyqtaldy.

«BARYS» tehnıkasy qozǵaltqyshtyń tartý kúshi jetispeýinen aryqtan óte almaı qoıdy. 2021 jyly júrgizilgen synaq «BARYS» brondy dóńgelekti mashınasynyń júris bóliginde, motor-jetek bóliginde, salqyndatý júıesinde aqaýlar kóp ekenin kórsetti (júris kezinde qozǵaltqysh qaıta-qaıta qyzyp ketip otyrdy)», - dep jazylǵan mınıstrliktiń BAQ-ta jarııalanǵan maqalaǵa bergen jaýabynda.

Sondaı-aq vedomstvo mamandary túrkııalyq tehnologııamen jasalǵan «ARMA» tehnıkasy men «Qazaqstan Paramaýnt Injınırıng» kompanııasy shyǵaratyn «BARYS» tehnıkasynyń aıyrmashylyǵyna toqtalady.

«Aspaq júıesin konstrýktsııalaý kezinde ketken qatelikterdiń saldarynan «BARYS» brondalǵan dóńgelekti mashınasynyń dóńgelekteri aǵytylyp kete beredi, tejeýishtiń sýpporty tez qyzady. Bul tejeýish júıeniń tıimdiligin azaıtady.

«ARMA» saýytty dóńgelekti mashınasyn jaýyngerlik synaqtan ótkizgen kezde júris bóliginde aıtarlyqtaı aqaýlar baıqalǵan joq.

«BARYS» saýytty dóńgelekti mashınasyndaǵy «Ansar» atys modýli dáldik jóninen aıtarlyqtaı qalys qalyp jatty. 2A72 zeńbireginen atqan kezdede, optıkamen, monıtormen jumys istegen kezde de aqaýlar tirkeldi», - dep jazylǵan mınıstrliktiń túsindirmesinde.

Buǵan deıin Qorǵanys mınıstrligi qaıeldiń pılotsyz ushatyn apparataryn paıdalanyp júrgeni týraly málimet bergen bolatyn.