Qorǵanys mınıstrligi Qazaqstan armııasynyń ımıdjin qalaı arttyryp jatyr

ASTANA. QazAqparat - Qazaqstan Respýblıkasynyń Qorǵanys mınıstrligi Qazaqstan armııasynyń ımıdjin arttyrý baǵytynda qandaı jumystardy júrgizýde? Bul suraqqa Qorǵanys mınıstri, general-polkovnık Sáken Jasuzaqovtyń májilismen Nurlan Dýlatbekovtyń depýtattyq saýalyna joldaǵan jaýabynda jazylǵan, dep habarlaıdy QazAqparat tilshisi.

«Qazaqstan Respýblıkasy Qarýly Kúshteriniń áskerı-patrıottyq tárbıeleýge, áskerı qyzmetti tanymal etý jáne onyń mártebesin arttyrýǵa baǵyttalǵan qyzmeti Qorǵanys mınıstrliginiń resmı saıtynda, respýblıkalyq jáne óńirlik BAQ-ta, áleýmettik jelilerde (Facebook, VKontakte, Instagram, Twitter) jáne teledıdarda jarııalanady. Áskerı-patrıottyq baǵyttaǵy derekti fılmderdi, beınerolıkterdi, beınesıýjetterdi túsirý júrgiziledi. Sonymen qatar, osy baǵytta «Aqsaýyt» («Qazaqstan» arnasynan), «Ásker.kz» («Habar 24») arnaıy baǵdarlamalary jumys isteıdi. Olardy aqparattyq súıemeldeý is júzinde bar baǵdarlamalar men jańalyqtar telearnalary sheńberinde júrgiziledi», - delingen mınıstrdiń jaýabynda.

Sáken Jasuzaqovtyń jaýabyna sáıkes, Qarýly Kúshter óskeleń urpaqty áskerı-patrıottyq tárbıeleýge qatysty ótkizetin is-sharalar apta saıyn Qorǵanys mınıstrliginiń «YouTube» resmı arnasynda jáne aptalyq «Sarbaz» gazeti men aı saıynǵy «Aıbyn» jýrnalynyń betterinde jarııalanady.

Mınıstr sondaı-aq jaýapty vedomstvo QR QM áskerı oqý oryndaryndaǵy oqý baǵdarlamalarynda áskerı tarıhty, orta ǵasyr dáýirindegi Qazaqstan kóshpendileriniń jáne Eýrazııa elderiniń jańa ýaqyttaǵy áskerı óneriniń tarıhyn zerdeleý kózdelgenin atap ótti.

«Qazaqstan Respýblıkasy Qarýly Kúshteri Áskerı-tarıhı mýzeıiniń qyzmetkerleri Astana qalasynyń oqýshylarymen jáne stýdentterimen áskerı-tarıhı taqyrypta júıeli túrde professor, arheolog Z.S. Samashevtyń «Qola jáne temir dáýirindegi áskerı nyshandar», professor A.Q. Kóshkimbaevtyń «Altyn Orda kezeńindegi áskerı óner», áskerı etnograf, áskerı sýretshi Q.S. Ahmetjanovtyń «Qazaq qarý-jaraǵynyń etnografııasy», «Qazaq handary men batyrlarynyń soǵys taktıkasy» ǵylymı dáristerin, sondaı-aq basqa da kórnekti ǵylym jáne qoǵam qaıratkerleriniń dáristerin ótkizedi», - dep jaýap bergen Sáken Jasuzaqov.

Eske sala ketsek, Parlament Májilisiniń 2 mamyrda ótken otyrysynda depýtat Nurlan Dýlatbekov ǵalymdar men stýdentterge arnap, qazaq tarıhyndaǵy Bas qolbasshylardyń esimimen ataýly granttardy taǵaıyndaýdy suraǵan bolatyn. Depýtat sondaı-aq, Qazaqstan armııasynyń ımıdjin arttyrý baǵytynda qandaı jumystar júrgizilip jatqanyn suraǵan aıtqan edi.