Qorǵanys mınıstrligi: Qaza tapqandardyń otbasylaryna qajetti kómek kórsetiledi

NUR-SULTAN. QazAqparat – Jambyl oblysynda oq-dári qoımalaryndaǵy jarylysta qaza tapqandardyń otbasylaryna qajetti kómek kórsetiledi, dep habarlaıdy QazAqparat QR Qorǵanys mınıstrligine silteme jasap.

Qorǵanys mınıstri Nurlan Ermekbaev Tótenshe jaǵdaılar mınıstri ıÝrıı Ilın jáne Jambyl oblysynyń ákimi Berdibek Saparbaevpen birge qaza tapqandardyń otbasylaryna baryp, kóńil aıtty jáne qajetti kómek kórsetiletinin jetkizdi.

«Qorǵanys vedomstvosy basshysynyń tapsyrmasy boıynsha Jambyl oblysyna qaza tapqandardyń otbasylaryn turǵyn úımen qamtamasyz etý jáne ótemaqy tóleý máselelerin sheshý maqsatynda Qorǵanys mınıstriniń orynbasary general-maıor Muhamedjan Talasov keldi», delingen habarlamada.

Esterińizge sala ketsek, 26 tamyzda saǵat shamamen 19:00-de Jambyl oblysynyń Baızaq aýdanynda ornalasqan áskerı bólim qoımalarynyń birinen órt shyǵyp, joıqyn jarylys boldy. Sońǵy málimet boıynsha, Jambyl oblysyndaǵy jarylystan 13 qaza tapqan.

Densaýlyq saqtaý mınıstrliginiń málimetine sáıkes, barlyǵy 98 adam medıtsınalyq kómekke júgingen. Olardyń 37-si aýrýhanaǵa jatqyzylyp, qalǵandary jaraqat pýnktterinde tıisti kómek alyp, úılerine jiberilgen.

Taraz qalasynyń statsıonarlarynda em alyp jatqan zardap shegýshiniń beseýi reanımatsııada, ekeýiniń jaǵdaıy aýyr.

QR Prezıdenti Qasym-Jomart Toqaev 29 tamyzdy Jalpyulttyq aza tutý kúni dep jarııalady.

Tótenshe jaǵdaıdyń saldaryn joıý úshin vedomstvoaralyq memlekettik komıssııa quryldy, Onyń Premer-mınıstrdiń orynbasary Roman Sklıar basqarady.