Qorǵanys mınıstrligi ǵımaratynyń ústinen dron ushyrǵandar ustaldy

NUR-SULTAN. QazAqparat – Búgin Qorǵanys mınıstrligi ǵımaratynyń baqylaý-ótkizý pýnktiniń aýmaǵynda basqarýsyz ushý apparaty (kvadrokopter) anyqtaldy, dep habarlaıdy QazAqparat mınıstrliktiń baspasóz qyzmetine silteme jasap.

Áskerı polıtsııa toby kvadrokopter ıelerin ǵımarat mańaıynda ustap, Nur-Sultan qalalyq Esil aýdany polıtsııasy basqarmasynyń patrýldik qyzmet mamandaryna tapsyryldy.

Qorǵanys mınıstrligi drondardyń ıelerine «Qazaqstan Respýblıkasynyń áýe keńistigin paıdalaný jáne avıatsııa qyzmeti týraly» QR Zańymen rettelgen áýe keńistigin paıdalaný erejelerin, sondaı-aq drondardy paıdalaný erejelerin qatań saqtaý qajettigin eskertedi.

Áskerı obektilerdiń ústimen kvadrokopterlerdi ruqsatsyz ushyrý – QR «Ákimshilik quqyqbuzýshylyq týraly» QK 563-babyna sáıkes, quqyq buzǵan jeke tulǵalarǵa 10 AEK, al laýazymdy tulǵalarǵa 20 AEK aıyppul salynady.

«Qazaqstan Respýblıkasynyń áýe keńistigin paıdalaný jáne avıatsııa qyzmeti týraly» QR Zańynyń 33-babynyń 3-tarmaǵyna sáıkes, erekshe qorǵalatyn áskerı obektilerdiń ústinen arnaıy qurylǵylardy ushyrý úshin memlekettik kúzet qyzmetiniń kelisimi kerek.

Qazirgi tańda zańǵa qaıshy áreketteri úshin basqarýsyz ushatyn qurylǵy arnaıy jolmen zalalsyzdandyrylyp, ıeleri ákimshilik jaýapkershilikke tartyldy.