Qorǵanys mınıstrligi el mektepterinde ótken ekologııalyq saǵatqa qatysty

NUR-SULTAN. QazAqparat – Búgin Qazaqstanda respýblıkalyq ekologııalyq saǵat ótti. Atalmysh aktsııany QR Qorǵanys mınıstrligi de qoldady, dep habarlaıdy QazAqparat.

Elordadaǵy № 68 orta bilim beretin mekteptiń oqýshylary QR Qorǵanys mınıstriniń orynbasary general-maıor Tımýr Dándibaevpen elordada aǵash kóshetterin otyrǵyzdy. Ol oqýshylarǵa tabıǵatty aıalaý qajettigin aıtyp ótti. Sebebi densaýlyǵymyz, sondaı-aq elimizdiń bolashaǵy qorshaǵan ortanyń jaǵdaıyna tikeleı baılanysty.

«Áskerı qyzmetshiler de aktsııadan shet qalmady. Myńdaǵan ofıtser, serjanttar men sarbazdar ózderiniń óńirlerinde aýmaqty tazartý boıynsha ótkiziletin sharalarǵa belsendi túrde qatysýda», - dep atap ótti Tımýr Dándibaev. Ol jas urpaqty aktsııany jalǵastyrýdy qoldaýǵa, qorshaǵan ortany aıalap, qorǵaýǵa shaqyrdy.

Sondaı-aq ekologııalyq saǵat aıasynda oqýshylarmen sabaq ótkizilip, onda tabıǵatqa sanaly túrde barynsha qamqorlyq kórsetý jaıy, energııa tıimdiligi men qoqysty bólip jınaýdyń qajettigi aıtyldy.