Qorǵanys mınıstrligi Astana aerodromy mańynda ushýǵa shekteý qoıylmaǵandyǵyn málimdedi
«QR Qorǵanys mınıstrligi tarapynan «Astana» jáne «Qaraǵandy» aerodromdary aýdandarynda áýe keńistigin paıdalanýǵa eshqandaı shekteý qoıylmaǵandyǵy týraly habarlaımyz», - delingen baspasóz qyzmeti taratqan habarlamada.
Mınıstrliktiń málimdeýinshe, áskerı áýe kemeleriniń belgilengen jol baǵyttary azamattyq avıalaınerlerdiń «Astana» aerodromynan ushyp-qoný kezindegi ushý kestelerine kedergi jasaǵan joq.
Sonymen qatar, jattyǵýlar aıaqtalǵanǵa deıin azamattyq áýe kemeleriniń ushýyna tıym salý sheshimi Astana qalasy áýejaıynyń dıspetcheri tarapynan óz betinshe qabyldanǵan.
Qazirgi kezde áskerı avıatsııanyń paradqa daıyndyq kúni men qysqa ýaqyttyq shekteýler ýaqyttary naqtylanǵan jáne aeronavıgatsııalyq aqparatqa (NOTAM) ózgertý engizý týraly habarlamaǵa engizilgen, bul avıakompanııalarǵa ushyp-qoný ýaqyttaryn ýaqtyly retteýge múmkindik beredi.
Eske sala ketsek, buǵan deıin Astanada QR Qarýly kúshteriniń qurylǵanyna 25 jyl tolýyna oraı áskerı sherýge daıyndyq jáne ótkizý kezeńine baılanysty áýe keńistigin paıdalanýǵa qysqa merzimge shekteý engiziletindigi habarlandy . Sonymen qatar, Astana áýejaıy áskerı sherýge daıyndyqqa baılanysty ýaqytsha ushý kestesin ózgertedi.
