Qorǵanys mınıstrligi: Áskerlerimiz aldyna qoıylǵan mindetterdi oryndaýǵa ázir

ASTANA. 13 qańtar. QazAqparat - Aqmola óńirlik garnızonynyń áskerı qyzmetshileri áskerı tehnıkamen marsh jasady. Astana mańynda Qorǵanys mınıstrliginiń áskerıleri dalalyq komandalyq pýnkt óristetti. «Іs-shara 2014 oqý jylyna arnalǵan jaýyngerlik daıarlyq josparynyń sheńberinde ótkizildi. Úsh kúndik marshqa QR Qorǵanys mınıstrligi astanalyq brıgadasynyń 37 mashınasy qatysty. Marshrýt uzaqtyǵy 200 shaqyrymdy qurady», - delingen atalǵan vedomstvo baspasóz qyzmetiniń málimetinde.

Áskerı tehnıka marshynyń qorytyndy kezeńine Qorǵanys mınıstriniń birinshi orynbasary - QR Qarýly Kúshteri Bas shtabynyń bastyǵy general-polkovnık Sáken Jasuzaqov qatysty. «Búgin biz Qorǵanys mınıstrliginiń dalalyq komandalyq pýnktin, onyń ázirligi men múmkindikterin tekserý úshin óristettik jáne jedel toptarymyzdyń jumysyn baıqap kórdik», - dedi QR QK Bas shtab bastyǵy.

Buryn habarlanǵandaı, avtomobılder marshyn oryndaý negizgi mindetteriniń biri áskerı qyzmetshilerdiń áskerı tehnıka júrgizý daǵdysyn jetildirý boldy. Sondaı-aq dalalyq jaǵdaıda Ortalyq Azııa óńirinde teńdesi joq shtabtyq mashınalardyń tórt modýldi kesheni synaqtan ótti. Bul keshen Qazaqstan armııasynyń sapyna 2012 jyly kelip túsken bolatyn.

Esterińizge sala keteıik, 8 qańtarda Qazaqstan Qarýly Kúshterinde jańa oqý jyly bastaldy. Ol «Kásipqoı maman - Armııa negizi» uranymen ótýde. 2014 jyldyń erekshiligi kásibılendirýge baılanysty Qarýly Kúshter jańa jaýyngerlik daıarlyq baǵdarlamalaryna kóshedi. Baǵdarlamanyń pılottyq nusqasynda ol QR Qurlyq áskerleriniń birneshe brıgadasynda synalatyn bolady. Jyl sońynda osy baǵdarlamalardyń qorytyndysy shyǵarylyp, olardyń maqsatqa sáıkestigi men qajettiligi aıqyndalady.

Osy oraıda S. Jasuzaqov sonymen qatar Qazaqstan armııasyndaǵy alǵashqy jaýyngerlik daıarlyq aptasynyń qorytyndysyn shyǵardy.

«QR QK Áýe qorǵanysy kúshterinde avıatsııalyq tehnıkanyń jaýyngerlik jáne oqý-jattyǵý mindetterin oryndaýǵa ázirligi tekserildi. Budan basqa, QR Qarýly Kúshteri jaýyngerlik dabyl boıynsha kóterilip, aldyn-ala josparlanǵan is-sharalardy túgel oryndap shyqty. Búgingi tańda búkil jeke quram kerek-jaraqpen tolyq qamtamasyz etilgen jáne áskerlerimiz aldyna qoıylǵan mindetterdi oryndaýǵa ázir», - dep QR QK Bas shtabynyń bastyǵy atap ótti.

Áskerı qyzmetshiler QR Qorǵanys mınıstriniń tapsyrmalaryn tabysty oryndap shyqty.