Qorǵanys mınıstrligi áskerıler arasynda aqsha jınaý týraly: Shaǵym túsken joq

NUR-SULTAN. QazAqparat – QR Qorǵanys mınıstriligi Tárbıe jáne ıdeologııalyq jumys departamentiniń bólim bastyǵy Baýyrjan Arynov áskerıler arasyndaǵy aqsha jınaý problemasyna qatysty pikir bildirdi, dep habarlaıdy QazAqparat tilshisi.

«Áskerı bólimderde tirkelgen aqsha jınaý aqparaty týraly pikir bildirińizshi. Ondaı habarlar túrli bólimderden túsip jatyr. Komıssııa kelgen saıyn ofıtserlerden aqsha jınaıtyn kórinedi. Sizderge osnydaı shaǵymdar túse me?», - dep surady jýrnalıst ortalyq kommýnıkatsııalar qyzmetinde ótken brıfıngide.

Baýyrjan Arynovtyń deregi boıynsha, áskerı bólimderge komıssııa shyǵar kezde, komıssııa múshelerimen arnaıy kezdesýler ótkizilip, nusqaý jumystary júrgiziledi.

«QR Qylmystyq kodeksiniń baptarynda áskerı bólimderdi tekseretin ofıtser nemese áskerı qyzmetshi zań buzbaýy kerektigi aıtylǵanyn eske salamyn. Qorǵanys mınıstrligine mundaı mándegi shaǵymdar túsken joq. Ondaıǵa jol bermeý úshin birqatar aldyn alý sharalary júrgiziledi. Tipti psıholog ta jumys isteıdi. Áskerı qyzmetshilerdiń arasynda jaýyngerlik qyzmettiń búkil máselesin qamtıtyn saýalnama júrgizemiz. Eger qandaı da bir problemaly másele anyqtalsa, áskerı bólimniń basshylyǵy keleshekte túıtkildiń qaıtalanbaýyna bar kúshin salady», - dedi bólim bastyǵy.

Onyń málimeti boıynsha, bıyl Qarýly kúshterde 7 sýıtsıd áreketi tirkelip, tórteýi qaıǵyly aıaqtalǵan.