Qorǵanys mınıstrligi áskerı áıelderdi 8 naýryz meıramdarymen quttyqtady (FOTO)
Atalmysh sharada merekelik kontsertpen qatar, qazaqstandyq sángerlerdiń áıelder kollektsııasynyń kórmesi ótti. Oǵan shamamen 200-ge tarta Qazaqstannyń áskerinde qyzmet etetin áıelder men 20-dan astam áskerı attashe jubaılary qatysty.
«Áıelderge qurmet, olardyń sulýlyǵyna, eńbekqorlyǵyna, analyq jylýlyǵyna bas ııý - eń jaqsy adamgershilik qasıetter. Bizdiń Otanymyz erlermen qatar turyp, kez kelgen ýaqytta kómektesýge daıyn áıelderimizdiń aldynda basyn ıedi. Uly Otan soǵysy maıdanynda myńdaǵan áıel qarý alyp, soǵysty, jaralylardy ólim aýzynan alyp qaldy. Erlik pen asqan batyldyq kórsetti. Tylda mıllıondaǵan áıel el táýelsizdigi úshin aıanbaı eńbek etti. Ózderiniń jylýlyqtarymen, senimi men mahabbatymen jaýyngerlerge rýh berdi», - dedi QR Qorǵanys mınıstriniń orynbasary, general-maıor Talǵat Muhtarov.
Merekege shaqyrylǵan meımannyń biri - Botakóz Musaeva. Ol áskerı áýletten shyqqandyqtan, áke jolyn qýýdy sheshken. Qazirgi ýaqytta ol Astana qalasyndaǵy Saryarqa aýdandyq qorǵanys isteri jónindegi basqarmasynda qyzmet etedi. 2015 jyly ol konkýrsanttardyń sulýlyǵyna ǵana emes, dene daıyndyǵyna mán beretin «Batyr arýlar» baıqaýyna qatysqan bolatyn. Baıqaýdyń 12 jeńimpazy 2016 jylǵy arnaıy kúntizbege shyǵyp otyr. Botakóz Musaeva «Naýryz arýy» dep tanyldy.
«Maǵan qıyn emes, qaıta Qazaqstanyma qyzmet etetinim ózime abyroı kórinedi. Bizdiń áskerde eshqandaı jeńildik berilmeıdi, degenmen áıelderimiz áskerde ózderin erkin sezinedi. Búginde Qazaqstan áskerinde 8 128 áıel adam bar jáne ol kórsetkish jyl sanap artyp keledi», - dedi ol tilshilerge bergen suhbatynda.
Sonymen qatar murajaıda attashe jubaılaryna arnalǵan ekskýrsııa uıymdastyryldy. Onda olar qazaq halqynyń jaýgershilik tarıhymen etene tanysýǵa múmkindik aldy.
Aıta keteıik, bizdiń elde 38 eldiń áskerı attashesi tirkelgen. Qorǵanys mınıstrligi seriktes memlekettermen álemde beıbitshilikti saqtaýǵa birlesken is-qımyldarǵa barýǵa daıyn. Byltyrdyń ózinde Reseı, AQSh, Qytaı, Túrkııa elderimen 10-nan astam birlesken áskerı jattyǵýlar ótkizildi.
