Qorǵanys mınıstrligi áskerdegi sýıtsıd faktileriniń jıileýin túsindirdi

NUR-SULTAN. QazAqparat – Qorǵanys mınıstrliginde áskerı qyzmetkerler arasynda sýıtsıdti aldyn alýǵa baǵyttalǵan «Ómirdi saqta» keshendi baǵdarlamasy ázirlenip jatyr. Bul týraly QazAqparat mınıstrlikke silteme jasap habarlaıdy.

«Sońǵy kezderi elimizdiń kúshtik qurylymdarynda oryn alǵan ózine-ózi qol jumsaý faktileriniń jıileýi túsindirýdi qajet etedi. Áskerı qyzmetshiniń ólimi tek Qarýly kúshterde ǵana emes, basqa da ásker túrlerinde oryn alyp otyr. Baǵynystylardyń ómiri men densaýlyǵyna UQK Shekara qyzmeti, ІІM Ulttyq ulany, Memlekettik kúzet qyzmeti jáne Tótenshe jaǵdaılar mınıstrligi de jaýapty. Beıbit ýaqytta atalǵan kúshtik qurylymdar Qarýly kúshterdiń quramyna kirmeıdi jáne Qorǵanys mınıstrligi olardyń qaýipsizdigin baqylamaıdy. Ózine-ózi qol jumsaý sııaqty sharasyz qadamǵa barý ol adamnyń týystary men jaqyndary úshin úlken qaıǵy. Komandırlerge de jaýyngerden aıyrylý aýyr shyǵyn. Qarýly kúshterde bolǵan árbir jaǵdaıdy áskerı polıtsııa qyzmetkerleri jáne basqa da qylmystyq qýdalaý organdary muqııat tekseredi. Tekserý nátıjeleri ózine-ózi qol jumsaý kóp jaǵdaıda áskerı qyzmetpen baılanysty emes ekenin kórsetti. Áskerge shaqyrýǵa deıingi kezeńde áskerı qyzmetshilerdi osyndaı áreketke ıtermeleıtin ár túrli ómirlik jaǵdaılar kezdesetinin eskerý kerek», - delingen mınıstrlik habarlamasynda.

Qazirgi ýaqytta Qorǵanys mınıstrliginiń bastamasymen ǵylym, quqyq qorǵaý organdary men úkimettik emes uıymdar ókilderiniń qatysýymen áskerı ortada orny tolmas shyǵyndy barynsha azaıtýǵa jáne sýıtsıdtiń aldyn alýǵa baǵyttalǵan «Ómirdi saqta» keshendi baǵdarlamasy ázirlenip jatyr.

Aıta ketsek, demalys kúnderi birqatar BAQ Jambyl oblysynda jaýynger ózine qol salǵany týraly aqparat tartty.

Jalpy bıyl Qarýly kúshterde 7 sýıtsıd áreketi tirkelip, tórteýi qaıǵyly aıaqtalǵan. Sonymen qatar QR Qorǵanys mınıstriniń orynbasary Darhan Ahmedıev áskerıler arasyndaǵy sýıtsıdke tólenbegen nesıeler de sebepker bolyp jatqanyn aıtty.