Qorǵanys mınıstrligi: Arnaıy operatsııa terrorıster tolyq joıylǵansha jalǵasady
Málim etilgendeı, elde arnaıy operatsııa terrorısterdi tolyq joıǵansha jalǵasady. Sonymen qatar qazir Almatyda Reseı bitimgershilik kúshimen Reseı azamattaryn otanyna qaıtarý jumystary júrgizilip jatyr.
«Qazaqstan aýmaǵynda jaǵdaı turaqty jáne memlekettik organdardyń baqylaýynda. Bitimgershilik bólimsheleriniń qolbasshylyǵyna alǵys aıtqym keledi. Bitimgerlik kúshter elimizdegi strategııalyq nysandardy qorǵap, elimiz úshin osyndaı syn saǵatta kómek kórsetti», - dedi QR Qorǵanys mınıstri mindetin atqarýshynyń orynbasary Sultan Qamaletdınov.
«Qazirgi ýaqytta bitimgershilik kúshter bólimshesi Almaty qalasynda jáne oǵan irgeles aýmaqtarynda ornalasqan áskerı, memlekettik jáne áleýmettik mańyzy bar nysandardy kúzetip júr. Qazaqstan tarapyna alǵysymdy bildirgim keledi. Bitimgershilik kúshterdi tez arada ornalastyryp, barlyq qajettilikpen qamtamasyz etti», - UQShU bitimgershilik kúshteriniń qolbasshysy Andreı Serdıýkov.
Ujymdyq qaýipsizdik týraly shart uıymynyń birlesken kúshteri Qazaqstanda tártipsizdikterdi basýǵa tikeleı qatyspaıdy. Tek jergilikti quqyq qorǵaý organdaryna qoldaý kórsetip, strategııalyq mańyzy bar nysandardy óz qorǵaýyna alady. Ujymdyq qaýipsizdik shart uıymy – memleketaralyq kelisim. Ol 1992 jyldyń 12 mamyrynda Tashkent qalasynda qurylǵan. Bul shartqa TMD-ǵa múshe memleketter – Qazaqstan, Armenııa, Qyrǵyzstan, Reseı, Tájikstan men Ózbekstan basshylary qol qoıǵan. Keıin quramynan Ózbekstan shyǵyp, Belarýs Respýblıkasy qosylǵan. Uıym jarǵysy boıynsha, bir nemese birneshe qatysýshy memlekettiń aýmaqtyq tutastyǵyna jáne táýelsizdigi nemese halyqaralyq beıbitshilik pen qaýipsizdigine qater tóngen jaǵdaıda qatysýshy memleketter bir-birine áskerı kómek kórsetedi.
