Qorǵanys mınıstrligi Almatydaǵy logıstıkalyq ortalyqtyń zańsyz salynýyna qatysty túsinik berdi
NUR-SULTAN. QazAqparat - Buqaralyq aqparat quraldarynda Qorǵanys mınıstrliginiń «GlobalEsologicalGroupAlmaty» JShS-men sot talqylaýy týraly málimetter paıda bolýyna baılanysty áskerı vedomstvo túsinik berdi, dep habarlaıdy Qazaqparat.
«Almaty qalasynda Qorǵanys mınıstrligine qaraıtyn 15 gektar jer telimi quqyq belgileıtin qujat negizinde (1999 jylǵy 29 qazandaǵy Almaty qalasy ákiminiń № 905/189 sheshimi) 2005 jyly Ákimshilik logıstıka ortalyǵyn salý úshin «GlobalEsologicalGroupAlmaty» JShS-ǵa zańsyz berilgen bolatyn. Jerdi berýdegi zańsyzdyq 2009 jyldyń 15 mamyrynda Almaty qalasy Mamandandyrylǵan aýdanaralyq ekonomıkalyq sotynyń jáne 2020 jyldyń 27 shildesindegi Almaty qalasy Azamattyq ister jónindegi sottyń appelıatsııalyq sot alqasynyń sheshimimen belgili boldy» delingen QR QM joldaǵan habarlamada.
Qorǵanys mınıstrligi qoldanystaǵy zańnamada belgilengen óz mindetterine sáıkes jáne prokýratýra organdarynyń talaptary boıynsha sotqa shaǵymdanǵan. 2009 jyldyń 15 mamyrynda Almaty qalasy Mamandandyrylǵan aýdanaralyq ekonomıkalyq sotynyń sheshimimen jerdi berýdegi málime zańsyz dep tanylǵan. Osyǵan qaramastan, óz isiniń zańsyz ekeni jóninde habardar bola tura, «GlobalEsologicalGroupAlmaty» JShS-nyń basshylyǵy qurylysty jalǵastyrǵan.
Osy kezeń boıy sot daýy bitpegen.
2020 jyly Almatynyń Azamattyq ister jónindegi sottyń appelıatsııalyq sot alqasy logıstıkalyq ortalyqty buzýǵa qaýly etip, Qorǵanys mınıstrliginiń paıdasyna sheshim shyǵarady.
«Logıstıkalyq ortalyqtyń qurylystary ornalasqan jer ýchaskesi áskerı áýeaılaqtyń ushý-qoný jolaǵyna tikeleı jaqyn ornalasqanyn atap ótý qajet. Bul áýe kemeleri men azamattyq ǵımarattardy paıdalanýǵa qaýip tóndiredi. 2019 jyldyń jeltoqsan aıynda Almaty áýejaıynyń janynda salynǵan turǵyn úıge qulaǵan «Bek Air» áýe kompanııasynyń ushaǵynyń apatqa ushyraýy mysal bola alady. Sondaı-aq, osy aýmaqta ornalasqan áýe bazasy Qazaqstan Respýblıkasynyń áskerı qaýipsizdigin qamtamasyz etý júıesine kiredi», - dep málńmdedi QR Qorǵanys mınıstrligi.
Logıstıkalyq ortalyqtyń qyzmetkerleri úshin mańyzdylyǵyn túsine otyryp, Qorǵanys mınıstrligi birneshe ret ózara qolaıly sheshimdi izdeý boıynsha kelissózder júrgizý týraly bastama kótergen. Sonymen birge, atalǵan uıymnyń resmı tulǵalary qyzyǵýshylyq tanytpaı, qorǵanys vedomstvosynyń usynystaryn nazarsyz qaldyrady.
Qazirgi ýaqytta, sot bul máselege núkte qoıǵan kezde, Qorǵanys mınıstrligi dıalogqa jáne ózara qolaıly sheshimge kelýge daıyn ekenderin málimdep otyr.
