Qorǵanys mınıstrligi 92 mln teńgeni jymqyrý isine qatysty túsinik berdi
«Buqaralyq aqparat quraldarynda Qaraǵandy oblysy boıynsha sybaılas jemqorlyqqa qarsy qyzmet QR QK ÁPOBB kúrdeli qurylys basqarmasynyń laýazymdy tulǵalaryna qatysty sotqa deıingi tergeý júrgizip jatqany týraly málimet tarady. QR QK Áskerlerdi páterlerge ornalastyrý bas basqarmasy 2015-2016 jyldary merdigerlik uıymmen áskerı bólimderdiń birinde qurylys jumystaryn júrgizýge kelisim-shart jasasty. Qurylys-montaj jumystary ýaqytynda aıaqtalyp, nysan shartta belgilengen merzimde tapsyryldy. Paıdalanýǵa qabyldaý týraly aktige 2016 jyldyń 26 qyrkúıeginde qol qoıyldy» dep málim etti vedomstvodan.
Qorǵanys mınıstrliginiń málimetinshe, qazirgi ýaqytqa deıin ǵımarattardyń bir bóligi rejımdik úı-jaıdyń qaýipsizdik talaptaryna sáıkes kelmegendikten paıdalanylmaı otyr.
«Mınıstrliktiń qazirgi basshylyǵy áskerı nysan qurylysynyń sapasy, ótken jyldardaǵy sharttardy adal oryndamaý faktileri, sondaı-aq jaýapty laýazymdy tulǵalardyń osy máselelerde sybaılastyqqa jol bermeý týraly máselesin birneshe ret kóterdi. Atap aıtqanda, 15 maýsymdaǵy apparattyq keńeste jarııa etip, qoldanystaǵy zańnamaǵa sáıkes shara qabyldaý jóninde nusqaý berilgen» deıdi mınıstrlik.
Qazirgi ýaqytta Qaraǵandy oblysy boıynsha Sybaılas jemqorlyqqa qarsy qyzmet merdiger uıymnyń sharttyq mindettemelerin adal oryndamaý faktisi boıynsha tergeý júrgizip jatyr.
Laýazymdy adamdardyń kinásine qatysty shara osy fakti boıynsha is júrgizý sheshimin qabyldaý nátıjesi boıynsha belgilenedi.
Eske sala keteıik, biz buǵan deıin Qaraǵandy oblysynda áskerı ǵımarat qurylysyna bólingen qarajatty jymqyrý kúdigimen basqarma ókilderi ustalǵanyn jazǵan bolatynbyz.