Qorǵanys mınıstrligi 7 mamyrda Qazaqstan tarıhynda tuńǵysh ret jaýyngerlik sherý ótkizedi

ASTANA. 14 naýryz. QazAqparat - Qazaqstan qorǵanys mınıstri Ádilbek Jaqsybekov Otan qorǵaýshy kúnin merekeleý qurmetine QR Qarýly Kúshteriniń jaýyngerlik sherýine ázirlik jáne ony ótkizý týraly buıryqqa qol qoıdy, dep habarlady QR Qorǵanys mınıstrliginiń baspasóz qyzmeti.

Ótken jyly «Qazaqstan Respýblıkasynyń merekeleri týraly» Zańǵa tolyqtyrý engizilip, Otan qorǵaýshylar kúni memlekettik merekege aınalǵan bolatyn.

Osy oqıǵanyń qurmetine jáne Qarýly kúshterdiń 21 jyldyǵyna oraı Qazaqstan tarıhynda tuńǵysh ret 7 mamyr kúni Gvardııalyq garnızon quramalary men bólimderiniń bazasynda Qazaqstan Qarýly kúshteriniń jaýyngerlik sherýi ótkiziledi.

Arnaıy jabdyqtalǵan alańdarda Qazaqstan Qarýly kúshterine sońǵy kezderi jetkizilgen áskerı tehnıkalar men qarýlandyrýdyń sońǵy úlgileri, sonymen qatar, olardyń jaýyngerlik qoldanylýy da kórsetiledi. Aıtalyq, S-295 ushaǵynyń ushyrý-qondyrý alańyna kelip qonýy josparlanǵan. Jaýyngerlik sherý kezinde avıatsııa men artıllerııanyń qoldaýymen áskerlerdiń praktıkalyq is-qımyly ótedi.

Sonymen birge, Gvardııalyq garnızon saltanatyna qatysýshylar tikeleı beınekórsetilim arqyly Kaspıı teńizi alabyndaǵy Qazaqstannyń Áskerı-Teńiz kúshteri kemeleriniń jaýyngerlik atysyn tamashalaı alady.

Qazaqstannyń qorǵanys-ónerkásiptik kesheni kásiporyndary da óz jetistikterin usynyp, áskerı mańyzdaǵy ónimderdi shyǵarýdaǵy qýaty men múmkindikterin pash etedi.