Qorǵanys mınıstri Jýaly jáne Rysqulov garnızondaryn aralady
Jumys sapary barysynda qorǵanys vedomstvosynyń basshysy Nurlan Ermekbaev Jambyl oblysynyń Jýaly jáne Rysqulov aýdandarynda ornalasqan áskerı bólimderdi tekserdi. Motoatqysh, tankti jáne barlaý bólimshelerin, sondaı-aq jekelegen baǵyttarda ornalasqan taýly-egerlik polkti tekserý kezinde qorǵanys vedomstvosynyń basshysy jaýyngerlik daıarlyq protsesin uıymdastyrý, jaýyngerlik ázirliktiń qajetti deńgeıin ustap turý, qoımalarda oq-dárilerdi saqtaý tártibi, sondaı-aq áskerı qyzmetshiler men olardyń otbasy músheleriniń áleýmettik-turmystyq jaǵdaılaryna erekshe nazar aýdardy.
Dabyl boıynsha kóterilgen barlaý bólimsheleri is-sharalar keshenin oryndady. Onyń ishinde, rotalar quramynda jaýyngerlik tehnıkada marsh oryndady jáne belgilengen ýaqytta belgilengen aýdanǵa shoǵyrlandy.
Qorǵanys mınıstriniń kelý nátıjeleri boıynsha jaýyngerlik daıarlyqty jetildirý, quqyq tártibi, áskerı tártip, sondaı-aq shalǵaı garnızondarda tynys-tirshiliktiń baqylanýyn uıymdastyrý máselelerine laýazymdy adamdardyń nazaryn kúsheıtý jóninde nusqaýlar berdi.
Aıta ketý kerek, Jýaly men Rysqulov aýdandarynda ornalasqan garnızondar Qorǵanys mınıstrligi qaramaǵyndaǵy «Ońtústik» óńirlik qolbasshylyǵyna baǵynyshty. «Ońtústik» óńirlik qolbasshylyǵy 2003 jyly qurylǵan. Almaty, Jambyl, Ońtústik Qazaqstan jáne Qyzylorda oblysynda ákimshilik turǵyda shekaralandyrylǵan. Shtab qolbasshylyǵy Taraz qalasynda ornalasqan. Óńirlik qolbasshylyq quramyna ortalyq baǵynyshtaǵy jáne Áýe qorǵanys kúshteriniń bólimderinen basqa shekaralyq shektegi áskerı bólimder kiredi. Búgingi tańda «Ońtústik» óńirlik qolbasshylyǵynyń qaramaǵyna 11 áskerı bólim qaraıdy. Óńirlik qolbasshylyqtyń áskerı qyzmetshileri kúndelikti qyraǵy qyzmet atqarýda. Olardyń arasynda ózderiniń erlikterimen kózge túsken beıbit kúnniń batyrlary da barshylyq.
«Ońtústik» óńirlik qolbasshylyǵynyń basty mindeti - Ońtústik-shyǵys shepterinde qaýipsizdikti qamtamasyz etý.
