Qorǵanys mınıstri tilshilerdi áskerı bólimshege saparlap qaıtýǵa shaqyrdy

ASTANA. QazAqparat - Qorǵanys mınıstri Rýslan Jaqsylyqov jastardyń áskerden jaltarýyna qatysty pikir bildirdi, dep habarlaıdy QazAqparat tilshisi.

«Eń aldymen, bul másele tárbıege qatysty bolýy múmkin. Sondyqtan dál qazir mınıstrliktegi jaýapty qyzmetkerge tıisti tapsyrma beremin. Ol arnaıy túrde avtobýspen jýrnalısterdi jaqyn jerdegi áskerı bólimshege jetkizedi. Sol jerde tilshiler ár sarbazben sóılese alady. Jaýyngerlerdiń qandaı jaǵdaıda qyzmet etip jatqanyn emin-erkin kóresizder. Bul bólimshede aldyn ala daıyndyq jasamaımyz», - dedi R. Jaqsylyqov Májiliste tilshiler suraǵyna jaýap bere otyryp.

Onyń paıymynsha, jastar arasynda patrıotızmdi keńinen nasıhattaý kerek. Ózi úshin de, otbasy úshin de, Otany úshin de jaýapkershilikti sezine biletin adamdy tárbıeleý kerek. Túngi klýbta óziniń demalysyna kóbirek kóńil bóletin adamdarǵa jaýapkershilik júkteý qıyndaý bolady.

«Óz halqyńnyń patrıoty bolsań, nege áskerge barmaısyń? Eger jastar túngi klýbta júrse, onda olardyń kóńil kóterýge, ýaqytyn bosqa ótkizýge densaýlyǵy jetkilikti ekenin bildiredi ǵoı?! Biraq olar ózderiniń áskerı boryshyn ótegisi kelmeıdi», - dedi Qorǵanys mınıstri.

Sonymen qatar ol Qarýly kúshterdiń basshylyǵy áskerdegi teris áreketterge tosqaýyl qoıý baǵytynda tıisti is-sharalardy uıymdastyryp jatqanyn aıtty.