Qorǵanys mınıstri Taraz garnızonyndaǵy áskerı bólimderdi tekserdi
Komıssııa quramynda Qorǵanys mınıstriniń orynbasarlary general-leıtenant Rýslan Shpekbaev, general-maıor Muhamedjan Talasov, Qurlyq áskerleriniń bas qolbasshysy general-maıor Talǵat Qoıbaqov, sondaı-aq Injenerlik áskerler, Radıatsııalyq, hımııalyq, bıologııalyq qorǵaý jáne ekologııalyq qaýipsizdik departamentteriniń, Áskerı ınfraqurylym bas basqarmasynyń ókilderi bar.
General-leıtenant Rýslan Jaqsylyqov Taraz garnızonynyń ınfraqurylym nysandarymen tanysyp, áskerı bólim komandırleriniń bólimshelerdiń maqsattary men mindetteri, olardyń jasaqtalýy, jaraqtandyrylýy, jaýyngerlik múmkindikteri, ınfraqurylymy men damý kókjıegi, aǵymdaǵy jaı-kúıi jáne problemalyq máseleleri týraly baıandamalaryn tyńdady.
Baızaq aýdanyndaǵy áskerı bólimde mınıstrge tehnıkalyq aýmaqty jarylys qaýpi bar oq-dárilerdiń qaldyqtarynan tazartý týraly baıandaldy. Oqıǵa saldarlaryn joıý boıynsha birikken jasaqtyń kúshimen Qaınar razeziniń, áskerı qalashyqtyń, uzyndyǵy bes shaqyrym temirjol jáne avtomobıl joldary, sondaı-aq áskerı bólimniń irgeles aýmaqtary tazartyldy. Injenerlik oq-dáriler bazasynyń aýmaǵy túgeldeı tazartyldy. Jarylys qaýpi bar zattar men metall synyqtarynyń bólshekteri arnaıy jabdyqtalǵan alańdar men jınaý pýnktine jetkizildi. Ashyq saqtalatyn jeti alań tazartylyp, oq-dári qaldyqtary jarylys alańyna áketildi.
Komıssııa osy aıda qaıta bastalatyn tazalaý jumystaryn jalǵastyrý daıyndyǵyn tekserdi. Ótken jyldyń tamyz aıynda bolǵan jarylysta habar-osharsyz ketken kishi serjant Baýyrjan Dáýitbaevty izdestirý jumystaryn jalǵastyrýǵa erekshe nazar aýdaryldy. Bul jumysty «Ońtústik» óńirlik qolbasshylyǵynyń bólimsheleri men Ulttyq ulannyń jeke quramyn jumyldyra otyryp júrgizý josparlanýda.
Qorǵanys vedomstvosynyń basshysy qarý-jaraq pen áskerı tehnıkany jóndeý protsesimen tanysty, sondaı-aq ushqyshsyz basqarylatyn apparattardyń mamandaryn daıarlaý ortalyǵynda boldy.
Qorǵanys mınıstri Qazaqstan Prezıdenti – Qarýly kúshterdiń Joǵarǵy bas qolbasshysy qoıǵan mindetter aıasynda bólimshelerdiń jaýyngerlik ázirligi men jaýyngerlik daıarlyǵyn qajetti deńgeıde ustaý, sondaı-aq aýmaqty qaýipsizdik talaptaryn qatań saqtaı otyryp tazartý jumystaryn jalǵastyrý jónindegi mindetterdi belgiledi.
