Qorǵanys mınıstri Soltústik óńirlik qolbasshylyǵy nege qurylmaǵanyn túsindirdi

NUR-SULTAN. QazAqparat – QR Qorǵanys mınıstri Rýslan Jaqsylyqov Qazaqstan Qarýly Kúshteriniń daıyndyq deńgeıi týraly pikir bildirdi, dep habarlaıdy QazAqparat.

«Biz – sarbazbyz. Biz óz memleketimizdi qandaı jaǵdaıda da qorǵaýǵa mindettimiz. Men Joǵarǵy Bas qolbasshynyń tapsyrmasy boıynsha Qarýly kúshterdiń daıyndyq deńgeıin tekserdim. Jaqynda ǵana oqý-jattyǵýdy aıaqtadyq, qazir taldaý júrgizip jatyrmyz. Qazaqstan halqy tynysh uıyqtaı alady degim keledi. Problemalar da bar – olar sheshilip jatyr. Jaýyngerlik múmkindikterdi arttyrý, materıaldyq-tehnıkalyq qamtamasyz etý protsesteri júrip jatyr. Qazaqstan Respýblıkasynyń Qarýly Kúshteri basqa áskerler men áskerı qurylymdar sııaqty memleketimizdiń konstıtýtsııalyq qurylysy men aýmaqtyq tutastyǵyn qorǵaý boıynsha óz mindetin oryndaıdy», - dedi Qorǵanys mınıstri Májilis otyrysynan keıin tilshilerge bergen suhbatynda.

Sonymen birge mınıstr elimizde «Soltústik» óńirlik qolbasshylyǵy nege joq degen suraqqa jaýap berdi.

«Ulttyq qaýipsizdik boıynsha tutas strategııa bar, Qarýly Kúshterdi qurý tujyrymdamasy bar, strategııalyq baǵyttar bar. Qajettilik bolyp jatsa qurylady («Soltústik» óńirlik qolbasshylyq – red.). Qazirgi ýaqytta mundaı óńirlik qolbasshylyq qurýdyń qajeti joq dep esepteımiz. Óıtkeni bul aımaq Astana óńirlik qolbasshylyǵynyń quramyna kiredi», - dep túsindirdi R. Jaqsylyqov.

Buǵan deıin Qorǵanys mınıstri bir áskerı sherý ótkizýge shamamen 4 mlrd teńge ketetinin aıtqan edi.

Bıyl Nur-Sultan qalasynda áskerı parad uıymdastyrylmaıdy.