Qorǵanys mınıstri Shymkent garnızonynyń áskerı bólimin dabyl boıynsha kóterdi
Qorǵanys vedomstvosynan málim etkendeı, mınıstr N.Ermekbaev tehnıkamen shoǵyrlaný aýdanyna jetken Shymkent garnızonyna qarasty áskerı bólimderdiń birin dabyl boıynsha kenetten kóterdi. Sondaı-aq qarý-jaraq pen áskerı tehnıkanyń saqtalý tártibi men sharttary, oqý-materıaldyq bazanyń jaı-kúıi, áskerı qyzmetshilerdi áleýmettik qamtamasyz etý máseleleriniń iske asyrylýy, ınfraqurylym jáne tehnıkalyq aımaq nysandary tekserildi.
Budan bólek, bólimshelerdiń jeke quramyna Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynyń iske asyrylýynyń negizgi baǵyttary túsindirildi.
«Sapar qorytyndysy boıynsha basshylyq quramalar men áskerı bólimderdiń qolbasshylyǵyna áskerı bólimder men bólimshelerdiń oqý-materıaldyq bazasyn, sondaı-aq áskerı qalashyqtardyń ınfraqurylymyn jetildirý, odan ári damytý jóninde naqty tapsyrmalar berildi. Odan basqa, Shymkent qalasynda mektepterdegi áskerı-patrıottyq tárbıe berýdiń rólin kúsheıtý týraly Memleket basshysynyń Joldaýynda aıtylǵan talaptardy iske asyrý sheńberinde QR Qorǵanys mınıstrligi, Shymkent qalasynyń ákimdigi jáne «Jas sarbaz» respýblıkalyq áskerı-patrıottyq qoǵamdyq qozǵalys arasyndaǵy yntymaqtastyq pen ózara is-qımyl týraly Memorandýmǵa qol qoıyldy», - delingen mınıstrlik habarlamasynda.
