Qorǵanys mınıstri resmı saparmen Ózbekstanda júr
«Ózbekstan Respýblıkasy – óńirdegi, onyń ishinde, qorǵanys salasyndaǵy Qazaqstannyń negizgi seriktesi. Jaýyngerlik daıarlyq, kadr daıarlaý, sondaı-aq birlesken is-sharalarǵa qatysý sııaqty elderimizdiń Qarýly Kúshteri arasyndaǵy yntymaqtastyq qos taraptyń da múddesine saı keledi» - dedi QR Qorǵanys mınıstri áriptesimen kezdesý barysynda.
Qorǵanys vedomstvolarynyń basshylary Ekinshi dúnıejúzilik soǵysta qaza bolǵandardy eske alýǵa arnalǵan «Azaly ana» monýmentine gúl shoǵyn qoıdy.
Sapardyń jalǵasy retinde mınıstrler «Shyrshyq» polıgonyna keldi. Onda «Qalqan – 2019» birlesken taktıkalyq arnaıy oqý-jattyǵýynyń belsendi fazasy bastaldy. Olardyń negizgi maqsaty - birlesken terrorızmge qarsy operatsııalarǵa daıyndalý men ony ótkizýde tájirıbe almasý, sondaı-aq ekijaqty áskerı yntymaqtastyqty damytý jáne jaýyngerlik baýyrlastyqty nyǵaıtý.
Stsenarıı boıynsha áskerı qyzmetshilerdiń basty mindeti zańsyz qarýly quralymdy anyqtaý jáne joıý boıynsha birlesken operatsııany sátti júrgizý boldy.
Shartty qarsylasty joıý úshin avıatsııa bólimshelerge áýeden qoldaý kórsetti.
Qazaqstannyń Qorǵanys mınıstri Nurlan Ermekbaev pen Ózbekstan qorǵanys vedomstvosynyń basshysy Bahodır Qurbanov eki el áskerı qyzmetshileriniń kásipqoılyǵy men bólimsheler is-qımylynyń úılesimdiligine joǵary baǵa berdi.
Aıta keteıik, bıylǵy sáýir aıynda eki el arasynda áýe shabýylyna qarsy qorǵanys salasyndaǵy yntymaqtastyq týraly, sondaı-aq Qazaqstan jáne Ózbekstan Qarýly Kúshteriniń áskerı aerodromdarynda áskerı áýe kemelerin qabyldaýdy, aerodromdyq-tehnıkalyq qamtamasyz etýdi jáne kúzetýdi uıymdastyrý týraly kelisimge qol qoıylǵanyn aıta ketken jón.
