Qorǵanys mınıstri Prezıdent Jarlyǵy boıynsha marapattalǵan áskerı qyzmetkerlerge memlekettik nagradalardy tapsyrdy
ASTANA. 14 jeltoqsan. QazAqparat - Búgin Qorǵanys mınıstrliginde Qazaqstan Respýblıkasy Táýelsizdiginiń 19 jyldyǵyna arnalǵan saltanatty kesh ótti.
Onda Qorǵanys vedomstvosynyń basshysy Ádilbek Jaqsybekov Prezıdent Jarlyǵy boıynsha marapattalǵan áskerı qyzmetkerlerge memlekettik nagradalardy tapsyrdy, dep habarlady vedomstvonyń baspasóz qyzmetinen.
Áskerı jáne qyzmettik mindetterin adal atqarǵany, erligi men janqııarlyǵy úshin birneshe áskerı qyzmetshi Otanymyzdyń joǵary nagradalaryna ıe boldy. «Endi II jáne III dárejeli «Aıbyn», «Qurmet» ordenderi, «Erligi úshin», «Jaýyngerlik epligi úshin» jáne «Eren eńbegi úshin» medalderi bizdiń áskerılerdiń keýdesinde jarqyraıtyn boldy», dedi mınıstr óz sózinde.
Sondaı-aq Qorǵanys mınıstri taǵy birneshe áskerı qyzmetshilerge gramotalar men baǵaly zattar tabys etti. Olardyń qatarynda Qytaıdyń Gýanchjoý qalasynda ótken jazǵy Azııa oıyndaryna qatysqan QR QM Armııashylardyń Ortalyq Sport klýby - Sport komıtetiniń sportshylary bar.
«Táýelsizdik alǵan jyldar aralyǵynda Prezıdentimiz, Qarýly Kúshterdiń Joǵarǵy Bas qolbasshysy memleketimizdiń qorǵanys qabiletin nyǵaıtýǵa erekshe kóńil aýdarǵan edi. Onyń basshylyǵymen qazirgi zamanǵy joǵary halyqaralyq standarttarǵa saı kásibı armııanyń qurylýyna baǵyttalǵan keshendi is-sharalar belsendi qabyldanýda. Jaýyngerlik mindetin úlgili oryndaǵany, joǵary kásibıligi, batyrlyǵy men qaısarlyǵy úshin alǵys aıtamyn. Qarýly Kúshterimizdiń jeke quramy Otanymyzdyń qaýipsizdigi men tynyshtyǵyn qamtamasyz etý múmkindigin týǵyzǵandyǵyn is júzinde rastady jáne Otanymyzdyń Qorǵaýshysy dep atalýǵa quqyǵy bar. Shyn júrekten sizderge baqyt, densaýlyq, bereke men Otanymyz - Qazaqstan Respýblıkasynyń ıgiligi úshin jemisti qyzmet etýdi tileımin», dep túıindedi óz sózin mınıstr.
Saltanatty is-shara merekelik kontsertpen aıaqtaldy.
