Qorǵanys mınıstri oq-dárilerdi qaýipsiz saqtaý máselesin kóterdi

NUR-SULTAN. QazAqparat - Memleket basshysynyń qarýly kúshterge júktegen mindetterin júzege asyrý aıasynda qorǵanys mınıstri, general-leıtenant Rýslan Jaqsylyqov «Batys» óńirlik qolbasshylyǵynyń áskerı quramalary men bólimderin aralady, dep habarlaıdy QazAqparat atalǵan mınıstrlikke silteme jasap.

Qorǵanys mınıstrliginiń komıssııasy garnızondardaǵy áskerı ınfraqurylymnyń jaı-kúıin, bólimshelerdiń jasaqtalýy men jaraqtandyrylýyn, sondaı-aq áskerlerdiń jaýyngerlik daıarlyq barysyn tekserdi.

«Batys» óńirlik qolbasshylyǵy áskerleriniń qolbasshysy general-maıor Nurlan Aldııarov pen áskerı bólim komandırleri aǵymdaǵy jaǵdaı men problemalyq máseleler jaıly baıandady.

Aqtóbedegi Áýe qorǵanysy kúshteriniń áskerı ınstıtýtynda general-leıtenant Rýslan Jaqsylyqov oqý-tárbıe úderisimen, joǵary oqý ornynyń oqý-materıaldyq bazasymen jáne kýrsanttardyń áleýmettik-turmystyq jaǵdaıymen tanysty.

Qorǵanys mınıstri oq-dárilerdi qaýipsiz saqtaýdy qamtamasyz etýge, zaman talabyna saı qoımalar salýǵa jáne buǵan qajetti jaǵdaıdyń jasalýyna erekshe nazar aýdaryp otyr.

Jumys sapary barysynda qorǵanys vedomstvosynyń basshysy Qarýly kúshterdiń Joǵarǵy Bas qolbasshysy Qasym-Jomart Toqaevtyń áskerdiń jaýyngerlik qabiletin túbegeıli arttyrý, áskerı bilim berý júıesin damytý, áskerı qyzmettiń bedelin kóterý, sondaı-aq jastardy áskerı boryshyn oryndaýǵa yntalandyrý jónindegi tapsyrmalaryn iske asyrýǵa qatysty birqatar mindetterdi belgiledi.