Qorǵanys mınıstri merzimdi áskerı qyzmetke sarbazdardy sapaly irikteýdi tapsyrdy

ASTANA. QazAqparat - Qorǵanys mınıstrliginde vedomstvo basshysy general-polkovnık Sáken Jasuzaqovtyń basshylyǵymen «Kóktem-2017» merzimdi áskerı qyzmetke shaqyrý naýqanyn uıymdastyrý máseleleri boıynsha selektorlyq keńes ótti, dep habarlaıdy QazAqparat.

Oǵan QR QK Bas shtaby jáne Qorǵanys mınıstrliginiń salalyq bólimsheleriniń basshylary, ásker túrleriniń bas qolbasshylary, ásker tekteriniń, QR QK óńirlik qolbasshylyq áskerleriniń qolbasshylary, sondaı-aq oblystar men Astana jáne Almaty qalalary ákimderiniń orynbasarlary - shaqyrý komıssııalarynyń tóraǵalary, oblystyq, Astana jáne Almaty qalalyq Qorǵanys isteri jónindegi departamentterdiń basshylary qatysty.

Jınalys barysynda Qarýly Kúshterdi, basqa da áskerler jáne áskerı qurylymdardy merzimdi qyzmettiń áskerı qyzmetshilerimen qamtamasyz etý máseleleri talqylandy jáne Ońtústik Qazaqstan oblysy men Jambyl oblystyq jergilikti áskerı basqarý organdarynyń shaqyrý komıssııalaryn tekserý jumystary qorytyndylandy.

QR QK BSh Uıymdastyrý jáne jumyldyrý jumystary departamentiniń bastyǵy general-maıor Múslim Daırov atap ótkendeı, bul keńeıtilgen selektorlyq jınalys áskerge shaqyrýdy uıymdastyrý barysyndaǵy tapsyrmalardy sapaly túrde oryndaýǵa baǵyttalǵan.

Jınalysty qorytyndylaı kele, áskerı vedomstvo basshysy jergilikti áskerı basqarý organdarynyń basshylyǵyna merzimdi áskerı qyzmetke shaqyrylýshylardy sapaly túrde irikteý jumystaryna qatysty birqatar naqty tapsyrmalar qoıdy.