Qorǵanys mınıstri Qurlyq áskerlerindegi qorytyndy synaqtar barysyn baqylady

dep habarlady atalǵan vedomstvonyń baspasóz qyzmetinen.

«Kóktal» oqý polıgonynda Qurlyq áskerleriniń bas qolbasshysy general-leıtenant Murat Máıkeevtiń jetekshiligimen áskerı basshylyq quramnyń tórt kúndik oqý-ádistemelik jıyny ótti. Jıynnyń maqsaty jedel jáne jaýyngerlik ázirlikti zamanaýı talaptarǵa sáıkes odan ári jetildirý jáne júrgizý bolyp tabylady.

Búginde Qurlyq áskerleriniń jaýyngerlik daıyndyǵyna el qaýipsizdigin qamtamasyz etetin tapsyrmalardy sheshý kepil bolady. Bul jerde negizgi kúsh eldi mekenderdegi, dalalyq jáne taýly jerlerdegi zańsyz qarýly qurylymdardyń kózin joıýǵa jumyldyrady.

Qorǵanys mınıstri synaqtardyń qorytyndysy shyǵarylǵan kúni rotalyq-taktıkalyq jattyǵýlardaǵy tájirıbelik sabaqtardy baqylady. «Kóktal» polıgonynda motoatqyshtardan, aeroutqyr jáne artıllerııalyq bólimshelerden quralǵan rotalyq taktıkalyq top armııalyq avıatsııanyń qoldaýymen taýly aımaqty qorǵap, shartty bandy quramyn qorshaýǵa alyp, olardyń kózin joıdy.

Jattyǵýlardy ótkizý barysynda jaýyngerlik rettilikke, atý júıesine, aımaqtaǵy ınjenerlik qurylǵylardy saýatty paıdalanýǵa, sondaı-aq jaýyngerlik qımyldarǵa aıryqsha mán berildi.

«Áskerı qyzmetshiler josparlaý jáne kúshterdi qoldanýda jaqsy tájirıbe aldy, - dep atap ótti Qorǵanys mınıstri. Qalada jáne taýly aımaqta urys júrgizýdiń ózindik qıynshylyqtary bar. Bul jaýyngerlerden tájirıbe men ártúrli ádisterdi talap etedi».

Qorǵanys mınıstri Ádilbek Jaqsybekov jeke quram taktıkalyq tájirıbelerin dáleldegen jattyǵýdyń qorytyndysyna qanaǵattanatyndyǵyn jetkizdi.

Atalǵan jattyǵý álemdik jetekshi derjavalardyń jaýyngerlik is-qımyldary men sheteldik armııalardyń jaýyngerlik daıyndyǵyna tereń taldaý júrgize otyryp ótkizildi. Qurlyq áskerleriniń basshylyǵy atap ótkendeı, matematıkalyq modeldeý júrgizilip, qashyqtyq jáne oq-dárilerdiń sany esepteldi.

Jıynnyń mańyzdy baǵyty retinde bólim komandırleri men olardyń orynbasarlarynyń kásibı biliktiligin tekserý bolǵanyn atap ótken jón. Qurlyq áskerleriniń basshylyq quramy taktıkalyq jáne arnaıy taktıkalyq daıyndyq boıynsha synaq tapsyrdy. Deneshynyqtyrý boıynsha da ofıtserler óz normatıvterin baǵyndyra aldy.