Qorǵanys mınıstri qoıan-qoltyq urys jarysynyń jeńimpazdaryn quttyqtady

NUR-SULTAN. QazAqparat - Búgin elimizdiń qorǵanys salasynyń basshysy Búkilqazaqstandyq qoıan-qoltyq urys qaýymdastyǵynyń tóraǵasy Nurlan Ermekbaev álem chempıonatynda sátti óner kórsetip, 21 nagradamen elge oralǵan sportshylarmen kezdesti. Bul týraly QazAqparat QR Qorǵanys mınıstrliginiń baspasóz qyzmetine silteme jasap habarlaıdy.

«Sportshylardyń bul jetistikteri komandanyń Qarýly Kúshter qataryndaǵy armııalyq qoıan-qoltyq urys jáne ózge de irikteý syndarynan sátti ótip, jaqsy daıyndyqta ekendiginiń kórsetkishi. Bul jolǵy kórsetkishter ótken jolǵydan áldeqaıda joǵary»,-delingen baspasóz málimetterinde.

Aıta keteıik, qazaqstandyq sportshylar jalpykomandalyq esepte ekinshi oryn aldy. Tartysty ótken básekede qazaqstandyq sportshylar 5 altyn, 6 kúmis jáne 10 qola medaldy jeńip aldy.

Sondaı-aq aıta ketetin másele, qoıan-qoltyq urystan eki márte álem chempıony Saǵym Qazybek osy týrnırde eńbegi sińgen sport sheberi normatıvin oryndady. Al, QR Qarýly Kúshteriniń áskerı qyzmetkeri E.Túsiphanov jarys nátıjesi boıynsha, chempıonattyń úzdik tóreshisi atandy.