Qorǵanys mınıstri qazaqstandyq bitimgerlermen kezdesti
General-leıtenant Nurlan Ermekbaev Tilendıev kentindegi bitimgershilik daıarlyq oqý-jattyǵýy ortalyǵynda kezekti bitimgerler kontıngenti quramynda Lıvanǵa ketip bara jatqan áskerı qyzmetshilermen kezdesti.
Qorǵanys mınıstri jaýyngerlerge arnaǵan sózinde Qazaqstannyń qaýipsizdik, yntymaqtastyq jáne damý salasyndaǵy senimdi áriptes retinde alatyn ornyn nyǵaıtý úshin áskerı qyzmetshilerimizdiń bitimgershilik mıssııalarǵa qatysýynyń mańyzdy ekenin atap ótti.
«Búgin sizder úshin de, jalpy Qarýly Kúshter úshin de erekshe kún. Uzaq daıyndyq pen muqııat irikteýden keıin sizder mıssııany oryndaý úshin úlken jolǵa attanasyzdar. Mıssııa mol tájirıbe jınaqtap, jaýyngerlik áleýetti nyǵaıtýǵa múmkindik beredi» – dep atap ótti general-leıtenant Nurlan Ermekbaev.
Qorǵanys vedomstvosynyń basshysy bitimgerlerge jaýyngerlik joldastyqty joǵary qoıa otyryp, bir-birine qoldaý kórsetýmen mıssııany sátti oryndap, úılerine aman-esen oralýyna tilektestik bildirdi.
Qazaqstannyń Lıvandaǵy bitimgershilik mıssııasy 2018 jyly qazan aıynda bastalǵany esterińizde bolar. Qazirgi ýaqytta onda Úndistan batalonynyń quramynda tórtinshi qazaqstandyq bitimgershilik rota mıssııasyn aıaqtaýda.
Qorǵanys mınıstri jumys sapary barysynda Almaty jáne Gvardeısk garnızondarynyń áskerı bólimderin aralaýdy josparlaýda.
