Qorǵanys mınıstri Dáýlet Turlyhanovtyń ulyna qatysty pikir bildirdi

ASTANA. QazAqparat - Qorǵanys mınıstri Rýslan Jaqsylyqov depýtat Dáýlet Turlyhanovtyń ulynyń buzaqylyq áreketine qatysty pikir bildirdi, dep habarlaıdy QazAqparat tilshisi.

«Biz sot sheshimine jaýapty emespiz. Qylmystyq is qozǵalyp, jiberildi. Endi sot úkimi jarııalanady. Jaýapkershilikten eshkim jaltarmaıdy. Men qylmystyq is boıynsha túsinikteme bere almaımyn, qylmystyq qýdalaý organdary bar. Sondyqtan sot sheshim jasaıdy», - dedi Rýslan Jaqsylyqov Májiliste tilshiler suraǵyna jaýap bere otyryp.

Mınıstrdiń aıtýynsha, kúdikke ilingen sarbaz jaýapkershilikten jaltarmaıdy.

«Kez kelgen sarbaz men úshin birdeı. Eger zań men tártipti buzsa, onda jaýapqa tartylady. Eshkim de jasyrynyp júrgen joq. Elimizdiń zańy bar jáne tıisti sheshim zańnamaǵa sáıkes jasalady», - dedi Qorǵanys mınıstri.

Eske salsaq, Almatyda zańger Anna Dmıtrıevıch pen onyń kúıeýi Oleg Chernov soqqyǵa jyǵylǵan edi. Almaty qalalyq Polıtsııa departamenti atalǵan derek QR QK-niń 293-baby «Buzaqylyq» boıynsha sotqa deıingi tergeýdiń biryńǵaı tizilimine tirkelgenin habarlady.

Keıin sport qaıratkeri Dáýlet Turlyhanov balasynyń buzaqylyq áreketine baılanysty pikir bildirdi.

Bıyl sáýirde Bas áskerı prokýratýra Dáýlet Turlyhanovtyń ulynyń isine qatysty túsinik berdi.