Qorǵanys mınıstri bıylǵy jarystardyń, sonyń ishinde XVI jazǵy Azııa oıyndarynyń júldegerlerin marapattaıdy
ASTANA. 7 jeltoqsan. QazAqparat /Gúlmıra Álıakparova/ - QR Qoǵanys mınıstri Gýanchjoýdaǵy XVI jazǵy Azııa oıyndarynan jáne jalpy 2010 jyly sporttyq jarystarda júldelerge ıe bolǵan áskerı sportshylardy kezekti ofıtserlik shendermen, ordendermen jáne medaldarmen marapattaıdy.
Bul týraly búgin «Astana-Arena» stadıonynda ótken baspasóz máslıhatynda QR Qorǵanys mınıstrligi Sport komıtetiniń tóraǵasy - Ortalyq áskerı sport klýbynyń (OÁSK) bastyǵy Erlan Talasbaev aıtty.
E.Talasbaev atap kórsetkendeı, bul baıraqty básekede Qazaqstannyń Ulttyq quramasy atynan óner kórsetken sportshylardyń 67-sin nemese 20 paıyzyn OÁSK-nyń músheleri qurady. Qazaqstannyń qorjynyna túsken medaldardyń 37 paıyzynyń nemese 29-yn áskerı-sportshylar jeńip aldy. Atap aıtqanda, 6 - altyn, 13 - kúmis jáne 10 qola júlde.
«Qazir Qorǵanys mınıstrligi basshylyǵynyń buıryǵy boıynsha, 2010 jyly altyn medaldarǵa ıe bolǵan barlyq sportshylardyń tizimi jasaldy. Olardy 21 jeltoqsan kúni mınıstr qabyldap, tıisti nagradalar men basqa da kótermeleý syılyqtardy tabys etetin bolady», - dedi ol.
E.Talasbaev saltanatty rásimniń barlyq qupııasyn ashqysy kelmegenimen, onda kezekten tys áskerı shender, ordender men medaldar, syıaqylar men kádesyılar beriletindigin aıtty.
XVI jazǵy Azııa oıyndarynan óz oıymen bólisken bylǵary qolǵap sheberi, altyn medal ıegeri Serik Sápıev: «Boksshylarymyzǵa tóreshiler tarapynan ádiletsizdikter kórsetilgen kezder boldy, biraq ózime qatysty ony aıta almaımyn», - dedi. Qarýly Kúshter quramynda 5 jyl eńbek ótili bar aǵa leıtenant S.Sápıev qyzmetin aldaǵy ýaqytta da jalǵastyratynyn jetkizdi. Onyń taıaý bolashaqtaǵy maqsaty - 2012 jyldyń qarasha aıynda Ázirbaıjanda ótetin Álem chempıonatynan abyroımen oralý.
