Qorǵanys mınıstri balalardy patrıottyqqa baýlý jóninde memorandým jasasty

PETROPAVL. QazAqparat – Petropavl qalasynda QR Qorǵanys mınıstri Nurlan Ermekbaev, Soltústik Qazaqstan oblysynyń ákimi Qumar Aqsaqalov jáne «Jas sarbaz» balalar men jasóspirimder áskerı-patrıottyq qoǵamdyq birlestiginiń basshylyǵy yntymaqtastyq týraly úshjaqty memorandýmǵa qol qoıdy, dep habarlaıdy QazAqparat tilshisi.

«Jas sarbaz» respýblıkalyq qozǵalysynyń qazirgi tańda el boıynsha 202 myń múshesi bar. Tek SQO-da ǵana qoǵamdyq birlestiktiń áskerı-patrıottyq 315 klýby jumys isteıdi. Ol 5 myń balany qamtyǵan.

«Áskerı-patrıottyq klýbtardyń basty mindeti – balalardyń boıynda Otanǵa degen súıispenshilikti tárbıeleý. Solardyń biri - «Jas sarbaz» qozǵalysy Elbasynyń tapsyrmasy boıynsha qurylǵan edi. Qoǵamdyq birlestiktiń ashylǵanyna kóp bola qoımasa da qazirgi ýaqytta onyń 6 myńnan astam uıymy bar. Oǵan 200 myńnan astam oqýshy qatysady», - dedi óńir basshysy Qumar Aqsaqalov.

Qorǵanys mınıstrligi, SQO ákimdigi jáne «Jas sarbaz» respýblıkalyq qozǵalysy arasyndaǵy yntymaqtastyq pen ózara is-áreket boıynsha úshjaqty kelisim áskerı-patrıottyq tárbıe berý baǵytyna jańa serpilis bermek. Buǵan deıin Prezıdent Q.Toqaevtyń tapsyrmasymen qoǵamdyq birlestiktiń janynan Smart-sarbaz úıirmeleri ashylǵan bolatyn.

«SQO-daǵy Smart-sarbaz úıirmesiniń jumys sapasy jáne oǵan qatysatyn oqýshylardyń sany boıynsha respýblıkada alda keledi. Olardyń jumysy tehnologııalyq baǵytty ustanǵan. Bul óńirde, meniń bilýimshe osyndaı 52 úıirme jumys isteıdi. Oblys ákimdigine, tıisti mekemelerge alǵysymdy bildiremin», - dedi kezdesýde Nurlan Ermekbaev.