Qorǵanys mınıstri áskerı qyzmetshilerdi Otan qorǵaýshy kúnimen jáne Qarýly Kúshterdiń 20 jyldyǵymen quttyqtady
ASTANA. 7 mamyr. QazAqparat - Búgin Qorǵanys mınıstri Ádilbek Jaqsybekov saltanatty jaǵdaıda áskerı qyzmetshilerdi Otan qorǵaýshy kúnimen jáne QR Qarýly Kúshteriniń qurylǵanyna 20 jyl tolýymen quttyqtady.
Bul týraly vedomstvonyń baspasóz qyzmetinen habarlady.
«Osydan týra 20 jyl buryn Qazaqstan Respýblıkasynyń Prezıdenti Nursultan Nazarbaev Qazaqstannyń Qarýly Kúshterin qurý týraly Jarlyqqa qol qoıdy. Sodan beri áskerimiz elmen birge damyp, býyny bekip, jaýyngerlik qýaty jyl saıyn artyp keledi. Búginde biz elimizdiń Qarýly Kúshterin Táýelsizdigimizdiń senimdi qorǵany dep maqtanyshpen aıta alamyz», - dedi Qorǵanys mınıstri.
Saltanatty jıynda mınıstr birqatar áskerı qyzmetshige memlekettik nagradalar men merziminen buryn áskerı shenderdi tabys etti.
Qorǵanys mınıstrligindegi saltanatqa áskerı qyzmetshilerdi merekelerimen quttyqtaýǵa Qarýly Kúshterdiń ardagerleri de keldi. Ádilbek Jaqsybekov ardagerlerge saltanatty jaǵdaıda mereıtoılyq medaldardy tabys etti.
«Otanymyz ben halqymyzdyń qaýipsizdigin el Qarýly Kúshteri qamtamasyz etedi. Al, áskerde qyzmet etý Qazaqstannyń árbir azamatynyń konstıtýtsııalyq boryshy ǵana emes, shyn máninde qurmetti is. Búginde Qarýly Kúshterimiz - barsha qazaqstandyqtyń maqtanyshyna aınaldy. Áskerı qyzmet qazaqstandyqtar úshin asa qurmetti mamandyq sanalady. Bul bizdiń mereıtoılyq jylda qol jetkizgen basty tabysymyz», - dep atap ótti vedomstvo basshysy.
Ardagerler atynan Qazaqstan Respýblıkasynyń tuńǵysh Qorǵanys mınıstri armııa generaly Saǵadat Nurmaǵambetov sóz sóılep, áskerı qyzmetshilerdiń aldyna qoıylǵan kez kelgen tapsyrmalardyń sózsiz oryndalatynyna senim bildirdi.
Qorǵanys mınıstri barsha áskerı qyzmetshini Otan qorǵaýshyr kúnimen quttyqtap, olarǵa zor densaýlyq, mol baqyt, qyzmette tabys tiledi.
