Qorǵanys mınıstri Arystaǵy jarylysqa qatysty «tabıǵı qubylys» degen sózine túsinikteme berdi
«Jaǵdaıdy ádil baǵalaý úshin jaýapkershilik pen kináni shatastyrmaǵan jón. Men jaýapkershilikten qashpaımyn. Al kináni sot anyqtaıdy. Buǵan deıin birneshe ret óz atymnan, áskerıler atynan Arys turǵyndaryna jaǵdaıǵa baılanysty ókinish bildirdim. Qaraly úıge kóńil aıttym, keshirim suradym. Áli de zardap shekkendermen júzbe-júz kezdesip, keshirim suraýǵa daıynmyn», - dedi mınıstr Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, áskerı adamnyń mindeti - ádemi sóz sóılep, popýlızmmen aınalysý emes, naqty ister arqyly jaǵdaıdy túzetý.
«Beıtanys jigit kelip, amandaspaı, ózin tanystyrmaı, ekonomıkaǵa nuqsan keltirdiń dep aıyptasa jáne kamera aldynda keshirim suraýdy talap etse, ár adam ártúrli jaýap qatar edi. Men de beıtanys adamǵa keshirim suraýdyń negizi joq dep jaýap berdim. Qaıtalap aıtamyn, men kamera aldynda emes, zardap shekken turǵyndardan keshirim suradym jáne taǵy suraýǵa daıynmyn», - dedi N. Ermekbaev.
Sonymen birge, mınıstr qoǵamdyq rezonans týdyrǵan «Tabıǵı nárse» sózi týraly túsinikteme berdi.
«Men orys mektebin bitirgenmin. 1 synyptan 10 synypqa deıin qazaq tilinde birde-bir sabaq almaǵanmyn. Sondyqtan, qazaq tilin múltiksiz bilemin dep aıta almaımyn. Biraq, elimizde qazaq tilin jetik biletin adamdar «tabıǵı nárse» sózin orysshaǵa durys aýdarmady. Sózdikte «tabıǵı» sózi eń aldymen «estestvennyı» dep aýdarylady. Aıtqym kelgeni, bólim komandırin kináli dep aıtýǵa bolmaıdy. Sebebi, árbir áskerı nysanda qaýip-qater bolady. Munda salǵyrttyq nemese nemquraılyq, ádeıi jasalǵan nemese tehnıkalyq sebepter bolýy múmkin. Ony arnaıy komıssııa anyqtaıdy», - dep óz sózin túıindedi Qorǵanys mınıstri.
Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Saldarynan úsh adam qaza tapty - Arys turǵyny men eki áskerı qyzmetshi. 170-ke jýyq adam zardap shekti. 20-ǵa jýyq úı, 9 qora-qopsy janyp, dalaly aýmaqta 14 oshaq tutandy. Úı-jaılar men ǵımarattardyń 80-90 paıyzyna ártúrli deńgeıde zaqym keldi. Birqatar óńirde shuǵyl jeliler quryldy.
Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi. Sondaı-aq Elbasy Nursultan Nazarbaev Arystaǵy jaǵdaıǵa alańdaýshylyq bildirdi. Tuńǵysh Prezıdenttiń tóraǵalyǵymen Qaýipsizdik keńesiniń otyrysy ótip, onda Arys qalasyndaǵy ahýal talqylandy.
Úkimet otyrysynda Premer-Mınıstr Asqar Mamın jarylys saldarynan kóz jumǵandardyń týǵan-týystaryna kóńil aıtyp, turǵyndarǵa barlyq kómek kórsetiletinin aıtty. Keltirilgen zalaldyń kólemi baǵalanyp, Úkimet rezervinen aqsha bólinedi.
Evakýatsııalaý kezinde myńnan astam ata-ana balarynan kóz jazyp qaldy. Sábılerdiń barlyǵy týys-týǵandaryna din-aman tapsyryldy.
Fakti boıynsha qylmystyq is qozǵady.
