Qorǵanys mınıstri Almaty kóshelerindegi tankilerdiń vıdeosyna qatysty túsinik berdi
NUR-SULTAN. QazAqparat – Qazaqstan Respýblıkasynyń Qorǵanys mınıstri Almaty kóshelerindegi tankilerdiń vıdeosyna qatysty túsinik berdi, dep habarlaıdy QazAqparat tilshisi.
«Keshe áleýmettik jelilerge tarap ketken vıdeorolıkke qatysty istiń mán-jaıyn túsindirip ketsem deımin. Vıdeorolık arqyly Almaty qalasynda aýyr tehnıka legi ketip bara jatyr degen aqparat tarady. Aqpan aıynyń sońynda Almatydaǵy desanttyq-shtýrmdyq brıgadanyń úsh tankisi polıgonǵa baryp, oqý-jattyǵý jıynynda josparly atysty, oqýdy ótkizgen bolatyn. Osy jyldyń 16 naýryzynda elde tótenshe jaǵdaıdyń jarııalanýyna baılanysty olar trallmen Almatydaǵy dıslokatsııa aýmaǵyna qaıtyp oralǵan edi», - dedi Nurlan Ermekbaev OKQ-da ótken baspasóz máslıhatynda.
Mınıstrdiń aıtýynsha 16 naýryzdan bastap dıslokatsııa aýmaǵynan shyǵarylmaı, áskerı daıarlyq sharalary toqtatylǵan.
«Qazir áskerı daıarlyq tek áskerı bólimderdiń ishinde júrgiziledi», - dedi ol.
