Qorǵanys mınıstri Aqtóbe garnızonynda boldy
Batys óńirge jumys sapary barysynda general-polkovnık Rýslan Jaqsylyqov áskerı ınfraqurylym nysandaryn tekserdi.
Aqtóbe oblysynyń ákimi Eraly Toǵjanovpen birge mınıstr eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteriniń áskerı ınstıtýtyna jáne oblys ortalyǵynyń basqa da birqatar mekemelerine bardy.
Qorǵanys vedomstvosynyń basshysy áskerı bilim ordasynyń oqý-materıaldyq bazasymen tanysyp, professorlyq-oqytýshylyq, ushqyshtar-nusqaýshylar jáne ınjenerlik-tehnıkalyq quramymen kezdesti.
General-polkovnık Rýslan Jaqsylyqov kýrsanttardyń tájirıbe ushýlaryn oryndaıtyn dalalyq áýeaılaǵyna bardy. Aqtóbe qalasynyń áskerı gospıtaline barǵan kezde general-polkovnık Rýslan Jaqsylyqov emdeý mekemesiniń jabdyqtalýymen jáne áskerı qyzmetshilerge arnalǵan medıtsınalyq kómekti uıymdastyrý júıesimen tanysty.
Aqtóbe oblysynyń ákimi Eraly Toǵjanov jalpy tájirıbede áskerı dárigerler daıyndaıtyn Áýe qorǵanysy kúshteriniń áskerı ınstıtýty men Batys Qazaqstan memlekettik medıtsına ýnıversıtetiniń yntymaqtastyǵyna oń baǵa berdi.
«Qaýipsiz el» ulttyq jobasynyń is-sharalaryn oryndaý, oq-dárilerdi qaýipsiz saqtaýdy qamtamasyz etý jáne qoımalardyń qurylysyna qatysty Memleket basshysynyń tapsyrmalaryn iske asyrýǵa erekshe nazar aýdarylyp otyr.
Jumys saparynyń sońynda qorǵanys vedomstvosynyń basshysy qoıylǵan oqý-jaýyngerlik mindetterdi tolyq jáne sapaly oryndaýǵa, qoımalardy salý barysynda tehnıkalyq reglamentterdi saqtaýǵa, áskerı obektilerdiń dıversııaǵa jáne órtke qarsy qaýipsizdigin qamtamasyz etýge baǵyttalǵan birqatar tapsyrmalar berdi.
