Qorǵanys mınıstri AQSh elshisine «Hıýı» tikushaǵy úshin alǵys aıtty
ASTANA. QazAqparat - Astanada Qazaqstan Respýblıkasynyń Qorǵanys mınıstri general-polkovnık Sáken Jasuzaqov AQSh-tyń Qazaqstandaǵy Tótenshe jáne ókiletti elshisi Djordj Krolmen kezdesti.
«Kezdesý barysynda eki eldiń qorǵanys vedomstvalary arasyndaǵy ekijaqty áskerı yntymaqtastyq máseleleri talqylanyp, áskerı kadrlardy daıarlaý aýqymynda ózara is-qımyl men tájirıbe almasý bolashaǵy, áskerı oqý oryndarynyń kýrsanttar men tyńdaýshylaryn ózara almastyrý múmkindikteri, sondaı-aq basqa da birqatar ózekti taqyryptar qozǵaldy», - dep habarlaıdy mınıstrliktiń baspasóz qyzmeti.
Elimizdiń qorǵanys vedomstvasynyń basshysy Tótenshe jáne ókiletti elshini áskerı-tehnıkalyq yntymaqtastyq aıasynda Qarýly Kúshterge amerıkalyqtar tarapynan jetkizilgen tórtinshi «Hıýı» tikushaǵy úshin alǵysyn bildirdi.
Búgingi kúni Qazaqstan men AQSh áskerı yntymaqtastyǵynyń kontekstine áskerı-dalalyq medıtsınany damytý men jeke quramdy daıarlaý sheńberindegi ózara múddeler kiredi. Eki eldiń 2018-2022 jyldarǵa arnalǵan jańa bes jyldyq josparynyń jobasynda ekijaqty áskerı yntymaqtastyqtyń keleshektegi máseleleri qamtylady.
