Qorǵanys mınıstri Ádilbek Jaqsybekov «Qarýly Kúshter Ardagerleri» Respýblıkalyq Qoǵamdyq birlestiginiń prezıdıýmymen kezdesti
ASTANA. 3 qazan. QazAqparat. Búgin Qazaqstan Respýblıkasy Qorǵanys mınıstri Ádilbek Jaqsybekov «Qarýly Kúshter Ardagerleri» Respýblıkalyq Qoǵamdyq birlestiginiń prezıdıýmymen kezdesti, dep habarlaıdy QR Qorǵanys mınıstrliginiń baspasóz qyzmeti.
- Biz Qarýly Kúshter ardagerlerine rızamyz. Olardyń arqasynda áskerdegi jáne áskerge shaqyrylýshy jastarǵa patrıottyq tárbıe berýge kóptegen paıdaly jumystar atqaryldy, - dep atap ótti Qazaqstan Respýblıkasynyń Qorǵanys mınıstri. - Ardagerler birlestigi shyn máninde bizge Qarýly kúshterge belsendi túrde kómek kórsete alatyn kúshke aınaldy.
Otanymyzǵa janqııarlyqpen qyzmet etkender búginde Qazaqstan armııasyna ofıtserler korpýsynyń kásibıligin arttyrýǵa, óz kómekterin kórsetip keledi. Olar áskerge shaqyrylýshy jastarmen kezdesedi, ata-analarmen birge jastardy armııa qataryna ózderiniń konstıtýtsııalyq boryshyn óteýge attandyrady, bul árıne jaqsy dástúr.
Qarýly Kúshter Ardagerleri búginde sapta: jas azamattarǵa ózderi ómirde basshylyqqa alǵan patrıottyq ıdeıalaryn úıretýden jalyqpaıdy.Olar jeńil jol tańdaǵan joq, óz joldastaryn jolda qaldyrmady, aspandaǵy juldyzǵa qol sozbady. Juldyzdar olardyń ózderin tapty, alǵys pen maqtaýǵa ıe boldy. Bolashaq Otan qorǵaýshylardyń sózimen aıtqanda, Otanǵa sheksiz qyzmet etýdiń ónegesi bolǵan ardagerlermen kezdesken árbir sát olardyń máńgilik esterinde qalmaq.
Kezdesý sońynda qorǵanys vedomstvosynyń basshysy Qazaqstan armııasynyń zapastaǵy jáne otstavkadaǵy generaldary men ofıtserlerine belsendi patrıottyq jumystary úshin alǵys aıtty, sonymen birge «Qarýly Kúshter Ardagerleri» Respýblıkalyq Qoǵamdyq birlestigi uıymdastyrý jaǵynan kúsheıip, halyqaralyq salada óz qyzmetiniń baǵytyn keńeıte túsýi qajettigin atap ótti.
