Qorǵanys máseleleri jáne áskerı qyzmet jónindegi zańdarǵa ózgerister engiziledi

ASTANA. 22 qazan. QazAqparat - QR Qorǵanys mınıstrligi «Qazaqstan Respýblıkasynyń qorǵanys máseleleri jáne áskerı qyzmet jónindegi keıbir zańnamalyq aktilerge ózgerister men tolyqtyrýlar engizý týraly» zań jobasyn ázirleýdi bastady.

Atalǵan zań jobasyn ázirleý qorǵanys jáne áskerı qyzmet salasyndaǵy qoǵamdyq qatynastardy retteıtin quqyqtyq normalarǵa quqyqtyq monıtorıng júrgizý barysynda anyqtalǵan qarama-qaıshylyqtardy joıýdyń qajettiginen týyndap otyr.

Qazirgi ýaqytta quramyna múddeli memlekettik organdar men ǵylymı mekemelerdiń ókilderi kiretin zań jobasyn ázirleý jónindegi jumys toby qurylýda.

Zań jobasyn jumys tobynda qarap bolǵannan keıin odan ári talqylaý úshin Qorǵanys mınıstrliginiń ınternet-resýrsyna ornalastyra otyryp, memlekettik organdarǵa kelisýge joldaý josparlanyp otyr. Bul týraly QR Qorǵanys mınıstrliginiń baspasóz qyzmetinen habarlady.