Qorǵanshylyq organdary jeke basqarma bolyp qurylady — QR Oqý-aǵartý mınıstrligi

ASTANA.KAZINFORM  — QR Úkimeti jergilikti atqarýshy organdardyń bazalyq qurylymyna Balalardyń quqyqtaryn qorǵaý jónindegi basqarmalar men bólimderdi engizý týraly sheshimdi qoldady. Bul týraly Oqý-aǵartý mınıstrliginiń baspasóz qyzmeti málim etti.

— Qorǵanshylyq organdary jergilikti atqarýshy organdardyń qoldanystaǵy shtattyq shegi aıasynda qurylady. Belgilengen normatıvke sáıkes, árbir 5 myń balaǵa keminde bir maman taǵaıyndalady. Bul bastama arqyly balalardyń tolyqqandy qamqorlyqta bolýyn qamtamasyz etýge baǵyttalǵan júıe negizin qurý kózdelgen. Osy rette Oqý-aǵartý mınıstrligi qorǵanshylyq organdarynyń mamandaryna arnalǵan oqytý trenıngterin uıymdastyryp jatyr.

Aıta ketý kerek, atalǵan reformalar Memleket basshysynyń tapsyrmasy boıynsha ázirlenip jatqan «Qazaqstan balalary» atty keshendi baǵdarlamanyń bir bóligi retinde iske asyrylyp otyr.

Eske sala keteıik, buǵan deıin Dınara Zákıeva Qazaqstanda qorǵanshylyq qyzmetkerleriniń sany artyp, jalaqysy kóteriletinin jazǵan bolatynbyz.