Qorǵanys jáne Oqý-aǵartý mınıstrlikteri kúsh biriktirmek
ASTANA. KAZINFORM – QR Qorǵanys mınıstri general-polkovnık Rýslan Jaqsylyqov pen QR Oqý-aǵartý mınıstri Ǵanı Beısembaev jumys kezdesýin ótkizdi. Bul týraly Qazaqstan Respýblıkasy Qorǵanys mınıstrliginiń saıty habarlady.
Taraptar óskeleń urpaqty áskerı-patrıottyq tárbıeleý jáne balalar men oqýshylardyń bos ýaqytyn maǵynaly uıymdastyrý salasyndaǵy yntymaqtastyq perspektıvalaryn talqylady. Olar budan bólek Qapshaǵaı sý qoımasynyń jaǵasynda ornalasqan «Altyn emel» keshenin osyndaı maqsatqa paıdalaný jónindegi vedomstvolar arasyndaǵy shartty uzartý jaıyn qozǵady.
Qorǵanys vedomstvosynyń basshysy búgingi tańda «Altyn emel» aýmaǵynda oqý-saýyqtyrý ortalyǵy tolyq jumys istemeıtinin atap ótti. Ol Qonaev qalasyndaǵy «Baldáýren» respýblıkalyq oqý-saýyqtyrý ortalyǵy fılıalynyń nysandaryn jóndeýge, sport alańdary men taǵy bir ashana salýǵa kómek kórsetýdi usyndy.
Mınıstrler «Baldáýren» ROSO-nyń tórt fılıalynda áskerı qyzmetshiler men Qarýly kúshter qyzmetkerleriniń balalaryna demalý, sondaı-aq erekshe bilim berýdi qajet etetin balalardy ońaltýǵa kvotalar bólý múmkindigin de talqylady.
– Jas sarbaz qozǵalysy bizdiń qoldaýymyzdyń arqasynda damyp, jumys istep keledi. Ár garnızondaǵy bul balalar osy oqý-saýyqtyrý ortalyqtaryna óz qatarlastaryn bilýge, demalýǵa, oqý aldynda kúsh-qýat jınap, tynyǵýǵa kele alady. Bul memlekettiń naqty qoldaýy bolmaq jáne biz óz tarapymyzdan qyzmettiń ózge de baǵyttary boıynsha kómektesýge daıynbyz, – dedi general-polkovnık Rýslan Jaqsylyqov.
Oqý-aǵartý mınıstri Ǵanı Beısembaev óz kezeginde «Baldáýren» ROSO barlyq fılıaldarynda áskerı qyzmetshilerdiń balalaryn saýyqtyrýǵa arnalǵan kvota týraly usynysty qoldady. Sóz barysynda ol áskerı bólimderdiń esikteri balalardyń aldynda jıi ashyla bastaǵanyn atap ótti.
– Biz qazir áskerı bólimderde ashyq esik kúnderiniń júıeli túrde ótkizilip jatqanyn baıqap otyrmyz. Mektep bitirýshi synyp oqýshylaryn áskerı-patrıottyq tárbıe salasyna belsendi tartý, olardy armııanyń kúndelikti ómirimen tanystyrý qajet, – dep atap ótti ol.
Mınıstr Ǵanı Beısembaev balalarmen jáne jasóspirimdermen jumys isteýge alǵashqy áskerı daıyndyǵyn uıymdastyrýshy oqytýshylar retinde áskerı zeınetkerlerdiń qatysýyna qoldaý bildirdi.
Kezdesý qorytyndysy boıynsha taraptar tıisti memorandým jasasý jáne balalar men oqýshylarǵa áskerı-patrıottyq tárbıe berý boıynsha birlesken jumys josparyn jasaý jóninde jumys júrgizýge sheshim qabyldady. Eki mınıstrliktiń yntymaqtastyǵy ashyq esik kúnderin ótkizýdi, «Baldáýren» ROSO fılıaldarynda úıirmeler, sport sektsııalaryn ashýdy jáne synyptardy taqyryptyq bezendirýdi kózdeıdi.
Bul baǵytta jumys ári qaraı jalǵasatynyn aıta ketken jón.
