Qorǵanys salasyndaǵy memlekettik tapsyrys Qorǵanys mınıstrligine qaıtarylady - Zań

ASTANA. KAZINFORM – Senat Qazaqstan zańnamasyn qorǵanys jáne áskerı-patrıottyq tárbıe turysynan jetildirýge baǵytalǵan zańdy eki oqylymda maquldady.

Qujattyń tolyq ataýy – «Qazaqstan Respýblıkasynyń keıbir zańnamalyq aktilerine áskerı-patrıottyq tárbıe, áskerı qyzmet jáne jekelegen ortalyq memlekettik organdardyń fýnktsııalaryn qaıta bólý máseleleri boıynsha ózgerister men tolyqtyrýlar engizý týraly» QR Zańy.

Negizgi baıandamany oqyǵan depýtat Andreı Lýkın bul zań áskerı baǵyttaǵy memlekettik tapsyrysty berý jáne iske asyrý fýnktsııasyn Qorǵanys mınıstrligine ótkizýge arnalǵanyn aıtty.

- Memlekettik qorǵanys tapsyrysyn júzege asyrý fýnktsııalary Ónerkásip jáne qurylys mınıstrliginen Qorǵanys mınıstrligine berildi. Qorǵanys mınıstrligi memlekettik tapsyrys salasyndaǵy ýákiletti organ retinde osy salada strategııalyq, retteýshi, iske asyrý jáne baqylaý fýnktsııalaryn júzege asyrady, - dedi senator.

Al qujattyń jańashyldyqtary týraly qosymsha baıandama jasaǵan senator Amangeldi Nuǵmanov zań keıbir jastarǵa áleýmettik lıft bola alatynyn atap ótti.

- Bul zań merzimdi áskerı qyzmet atqarý kezeńinde áskerı qyzmetshilerdiń azamattyq salada suranysqa ıe qosymsha mamandyq alýyna múmkindik beretinin erekshe atap ótkim keledi. Bul – kásibı bilimi joq jastar úshin myqty áleýmettik lıft. Mysaly, áskerı boryshyn óteý kezinde avtobýs júrgizýshisi mamandyǵyn meńgergen sarbaz, qyzmetin aıaqtaǵannan keıin qosymsha oqýsyz birden eńbekke aralasa alady, - dedi ol.

Zańda áskerı qyzmetti tartymdy ete túsýge arnalǵan sharalar qarastyrylǵan.

- Joǵary oqý oryndaryna túsý kezindegi jeńildikter, memlekettik bilim berý granty boıynsha mindetti óteýden bosatý, akademııalyq quqyqtaryn joǵaltpaı oqýyn jalǵastyrý múmkindigi kózdelip otyr. Munyń bári qazirgi jastar úshin áskerı qyzmetti tartymdy ári maǵynaly etedi, - dedi depýtat.

Eske salsaq, osy aıdyń basynda Qorǵanys mınıstrligine jańa basshy taǵaıyndaldy.