Qorǵanys salasyndaǵy máselelerdi sabyrmen sheship, odan taǵylym alǵan jón —Jarqynbek Amantaıuly
ASTANA. KAZINFORM — Mańǵystaýdaǵy qaıǵyly oqıǵadan keıin Qorǵanys mınıstriniń qyzmetinen bosatylýy jáne Qorǵanys mınıstrliginiń jumysyna keshendi tekserý júrgizilýi qorǵanys salasynda qordalanǵan máselelerdi anyqtap, olardyń sebepterin zerdeleýge múmkindik beredi. Bul týraly Quryltaı depýtaty Jarqynbek Amantaıuly aıtty.
Onyń pikirinshe, oqıǵanyń mán-jaıyn jan-jaqty anyqtaý úshin Úkimettik komıssııanyń jumys isteýimen qatar, Prezıdent Jarlyǵymen Qorǵanys mınıstrliginiń qyzmetine keshendi tekserý júrgizý tapsyrylýy — qorǵanys salasyndaǵy máselelerdi júıeli túrde qarastyrýǵa baǵyttalǵan qadam.
Depýtat qara jamylǵan otbasylardyń qaıǵysyn sózben jeńildetý múmkin emes ekenin atap ótti.
— Qapyda qaza bolǵan azamattardy eshteńe de qaıtara almaıdy. Degenmen osyndaı aýyr sátte memleket te, qamkóńil aǵaıyn da qaıǵydan qan jutqan otbasylarǵa qoldan kelgenshe qoldaý kórsetýge tyrysyp jatyr, — dedi Jarqynbek Amantaıuly.
Onyń aıtýynsha, bir top Quryltaı depýtaty el azamattarymen birge marqumdardy aqtyq saparǵa shyǵaryp salyp, qaıǵyǵa ortaqtasqan otbasylardyń janynan tabyldy.
Depýtat mundaı aýyr kezeńde qoǵamdaǵy turaqtylyq pen ózara túsinistikti saqtaýdyń mańyzyna da toqtaldy.
— Osyndaı urymtal sátti paıdalanyp, el ishinde alaýyzdyq týǵyzyp, qoǵamdy búlikke nemese dúrbeleńge bastaýǵa jol bermeý de asa mańyzdy, — dedi ol.
Jarqynbek Amantaıuly bolǵan jaǵdaıǵa sabyrmen qarap, odan tıisti qorytyndy shyǵarý qajet ekenin aıtty. Onyń sózinshe, eldiń aýyr qaıǵyny eńserýine sabyr men bereke-birlik kómektesedi.
— Qorǵasyndaı aýyr qaıǵyny parasatty eldiń sabyry men berekeli birligi ǵana kótere alady. Jaǵdaıdy ýshyqtyryp, ashý men arazdyqty órshitkennen elge de, sarbazdar sapynda júrgen azamattarǵa da paıda joq, — dedi Quryltaı depýtaty.
Ol qıyndyq kezinde eldiń birligi synalatynyn atap ótip, qasiretti sabyrmen eńserip, odan taǵylym alý barshaǵa ortaq mindet ekenin jetkizdi.
— Aýyr qasiretti sabyrmen eńserip, odan taǵylym alyp, bolashaqqa nyq qadam basý — barshamyzǵa ortaq mindet, — dedi Jarqynbek Amantaıuly.
Eske salaıyq, buǵan deıin Prezıdent Dáýren Qosanovty Qorǵanys mınıstri laýazymynan bosatqanyn habarlaǵan edik.
Onyń ornyna Aıdos Myrzahmetov Qorǵanys mınıstri bolyp taǵaıyndaldy.
Prezıdent jańa mınıstrge áskerı basqarý júıesin jetildirýdi tapsyrdy.
Prezıdent — Qazaqstan Respýblıkasy Qarýly Kúshteriniń Joǵarǵy Bas Qolbasshysy Qasym-Jomart Toqaev qorǵanys vedomstvosynyń basshylyq quramymen keńes ótkizdi.
Prezıdent sarbazdardyń qazasynan keıin áskerı basshylyqty qatań synǵa aldy.
