Qorǵanys salasynda 1 qyrkúıekten bastap tsıfrlyq bilim berý júıesi iske qosylady
ASTANA. KAZINFORM – Qazaqstanda áskerı oqý oryndary úshin biryńǵaı tsıfrlyq platforma ázirlendi. Jańa júıe oqý protsesin avtomattandyrýǵa, áskerı qyzmetshilerdi qashyqtan oqytýǵa jáne oqý oryndaryn bir keńistikke biriktirýge múmkindik beredi.
- Qorǵanys mınıstrliginiń tsıfrlyq transformatsııa aıasyndaǵy basty jetistikteriniń biri – elimizdegi barlyq áskerı oqý oryndaryna arnalǵan kópfýnktsııaly áskerı-bilim berý platformasynyń qurylýy. Bul platformany biz «Áskerı zııat» dep atadyq. Ol – joǵary oqý oryndarynda qoldanylyp júrgen MODUL sııaqty júıe, biraq budan da jetildirilgen nusqasy.
Onyń quramyna qazirgi joǵary oqý oryndary men kolledjderde júrip jatqan barlyq bilim berý protsesteri engizilgen. Platforma elimizdegi áskerı mamandar daıarlaıtyn barlyq joǵary oqý oryndary men áskerı kolledjderdi biryńǵaı keńistikke biriktirýge múmkindik beredi, - deıdi QR Qorǵanys mınıstriniń tsıfrlandyrý jónindegi orynbasary Darhan Ahmedıev.
Mınıstrlik ókili jańa platformanyń múmkindikterin túsindirdi.
- Júıe oqý protsesin tolyq avtomattandyrady: elektrondy kúndelikter, sabaq kestesi, termınder glossarııi, taldaý quraldary, esep berý júıesi qarastyrylǵan. Sonymen qatar syrtqy uıymdar da tek qaraý rejıminde paıdalana alatyn ortaq elektrondy kitaphana qarastyrylǵan, - deıdi maman.
Búginge deıin 300-den astam áskerı dál osy paltforma arqyly túrli kýrstarǵa qatysyp, sertıfıkat alyp úlgeripti.
- Qazirgi ýaqytta platformada 20 baǵyt boıynsha daıyndyq kýrstary júrgizilýde. 1000-nan astam áskerı qyzmetshi tirkelgen, onyń ishinde 300-den astamy oqýdy aıaqtap, sertıfıkattaryn osy platforma arqyly aldy, - deıdi QR Qorǵanys mınıstriniń tsıfrlandyrý jónindegi orynbasary.
Platforma áskerılerdiń shyǵynyn azaıtýǵa birshama yqpalyn tıgizipti.
- Platformany engizý arqyly biz áskerı qyzmetshilerdiń kýrstyq daıarlyqtan ótý úshin bólinetin issapar shyǵyndaryn qysqarttyq. Kýrstar qashyqtan oqytý formatynda tsıfrlanǵan soń, jolaqy, tamaqtaný syndy shyǵyndardy únemdeýge múmkindik týdy. Sonymen qatar, bul júıeniń artyqshylyǵy – ýaqyt boıynsha ıkemdiligi. Áskerı qyzmetshiler ózderine yńǵaıly ýaqytta oqyp, qyzmetten qol úzbeı kýrstardan óte alady, - deıdi Darhan Ahmedıev.
Mınıstrdiń tsıfrlandyrý jónindegi orynbasary jańa júıe 1 qyrkúıekten bastap tolyqtaı iske qosylyp, resmı túrde jumys protsessine engiziletinin aıtty.
- Qazir platforma is júzinde qoldanylyp, sońǵy synaq kezeńinen ótip jatyr. Biz ony tolyq engizý úshin barlyq qajetti satylardan ótkizemiz. Qazirgi tańda júıeni tájirıbe júzinde paıdalanyp jatyrmyz. Al 1 qyrkúıekten bastap resmı túrde tolyq qoldanysqa engizý josparlanǵan. Sonymen qatar, bul platformany Ǵylym jáne joǵary bilim mınıstrliginiń aqparattyq júıelerimen biriktirý jumystary da júrip jatyr, - deıdi ol.
Buǵan deıin jasandy ıntellekt áskerılerdiń JOO-ǵa túsý protsesin jeńildetetinin jazǵan edik.