Qorǵanys salasyna jaqsy deńgeıde kóńil bólinip jatyr — Muhtar Altynbaev
ASTANA. KAZINFORM — Burynǵy Qorǵanys mınıstri, Halyq Qaharmany, armııa generaly Muhtar Altynbaev elimizdiń Qarýly kúshterin nyǵaıtý jumystaryna qatysty pikir aıtty.
— Túgel istep jatqan baǵyttary durys. Jańa mınıstr qyzmetine kiristi. Áýe qorǵanys jaǵynan ońtaıly ózgerister bolady dep oılaımyn. Sondyqtan qorǵanys salasyna jaqsy deńgeıde kóńil bólinip jatyr dep sanaımyn. Qomaqty qarajat ta baǵyttala bastady. Endi ony durys ıgerýge nazar aýdarý mańyzdy, — dedi Muhtar Altynbaev Memleket basshysynyń Joldaýy aldynda tilshiler suraǵyna jaýap bere otyryp.
Onyń aıtýynsha, qazir syrttan da jaqsy tehnıka alynyp jatyr. Sonymen qatar, Qazaqstan aýmaǵynda da tıimdi tehnıkany óndirýge erekshe ekpin qoıylǵan.
Eske salsaq, bıyl maýsym aıynda Qorǵanys mınıstri laýazymyna Dáýren Jumataıuly Qosanov taǵaıyndaldy.
