Qorǵanys-ónerkásip keshenin damytý qory jyl aıaǵyna deıin qurylady – Á. Smaıylov

Úkimet mashına jasaý salasyn damytý jónindegi keshendi jospar ázirlep jatyr. Bul týraly Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Otandyq kásiporyndardy qoldaý úshin jyl sońyna deıin arnaıy Qorǵanys-ónerkásip keshenin damytý qory qurylatyn bolady. Sondaı-aq, Memleket basshysynyń tapsyrmasy boıynsha Mashına jasaý salasyn damytý jónindegi keshendi jospardyń jobasy daıyndalýda», - dedi ol Úkimet otyrysynda.

Aıtýynsha, atalǵan jospardy iske asyrý arqyly saladaǵy óndiristi 2 eseden astam, eksport kólemin 3 ese, negizgi kapıtalǵa salynatyn ınvestıtsııany 1,5 ese arttyrýǵa bolady.

«Bıyl Jeńil ónerkásipti damytýdyń jol kartasyn ózektendirý jumystary aıaqtalady. Onda toqyma óndiristerin qurý kezinde ınvestıtsııalyq shyǵyndardy óteý, memlekettik satyp alý barysynda otandyq óndirýshilerdi qoldaý sharalary kózdeledi», - dedi Úkimet basshysy.

Álıhan Smaıylov Indýstrııalandyrý kartasy aıasynda bıyl tamaq ónerkásibinde, qurylys ındýstrııasynda, mashına jasaýda, metallýrgııada jáne basqa salalarda 170 jobany iske qosý josparlanǵanyn eske saldy.

Bul shamamen 12,5 myń turaqty jumys ornyn qurýǵa múmkindik beredi deıtin esep bar.

«Qazir Prezıdent tapsyrmasyna sáıkes birqatar basym baǵyttarda joǵary deńgeıde óńdelgen ónim shyǵaratyn klasterlerdi qurý boıynsha iri jobalardyń tizbesi daıyndalýda.
Atap aıtqanda, munaı, gaz jáne kómir hımııasynda, metaldy tereń óńdeý, ýran ónerkásibi, mashına jasaý, avtokomponentter, tyńaıtqyshtar óndirisi jáne basqa salalarda osyndaı klasterler qurý kózdelip otyr. Munda ishki resýrstardy barynsha paıdalanýǵa jáne offteık-kelisimsharttardyń áleýetin iske qosýǵa basymdyq beriletin bolady», - dedi Premer-Mınıstr.